एजेन्सी । रुसले युक्रेनको दोनेत्स्क क्षेत्रमा रहेको पोक्रोभ्स्क नामक शहर कब्जा गर्न लागेको छ ।
यो मे २०२३ मा बाखमुतको पतनपछि रुसद्वारा कब्जा गरिने सबैभन्दा ठूलो युक्रेनी शहर हुनेछ । कुनै समयमा करिब ६० हजार मानिस बसोबास गर्ने पोक्रोभ्स्कमा अहिले निरन्तर बमवर्षाका बीच १३ सयभन्दा कम बासिन्दा मात्र बाँकी छन् ।
युक्रेनका राष्ट्रपति भोलोदिमिर जेलेन्स्कीका अनुसार, पोक्रोभ्स्क क्षेत्रमा अहिलेका करिब एकतिहाइ युद्ध र रुसका घातक ग्लाइड बम आक्रमणहरू केन्द्रित छन् । तर, यी तथ्यांकहरू स्वतन्त्र रूपमा प्रमाणित भएका छैनन् ।
युक्रेनको सैन्य समूह डीपस्टेटले जारी गरेको नक्सा हेर्दा रुसी सेनाले पोक्रोभ्स्कको दक्षिण–पश्चिमी भाग कब्जा गरिसकेको छ र शहरको केन्द्र तथा पश्चिमी क्षेत्रमा स्थिति मजबुत गरेको छ । बाँकी भागलाई यस समूहले रुसद्वारा क्रमशः निलिँदै गएको क्षेत्र भनेर वर्णन गरेको छ ।
पोक्रोभ्स्क पतन भएमा रुसलाई स्लोभियान्स्क र क्रामाटोर्स्कतर्फ पुग्ने बाटो खुला हुनेछ । यी दुई दोनेत्स्कका अन्तिम ठूला शहरहरू हुन् । त्यसलाई रुसका राष्ट्रपति भ्लादिमिर पुटिनले सन् २०१४ देखि आफ्नो नियन्त्रणमा ल्याउने चाहना राख्दै आएका छन् ।
क्रेमलिनका लागि पोक्रोभ्स्क कब्जा गर्नु युद्धमा गति हासिल गरेसरह हुनेछ र यसले ट्रम्प प्रशासनअन्तर्गत अमेरिकी समर्थन खोजिरहेको युक्रेनको स्थितिलाई थप कमजोर पार्नेछ ।
पुटिनले ट्रम्पको युद्धविराम आह्वानलाई बेवास्ता गर्दै ठूलो मूल्य चुकाउँदै भए पनि आक्रमण जारी राखेका छन् ।
त्यस्तै, युक्रेनी फौजहरू शहरको रक्षा गरेर रुसको सफलताको कथालाई खण्डन गर्न र रुसी सेनालाई ठूलो क्षति पुर्याउन लडिरहेका छन् ।
अमेरिकाकी रक्षा अधिकारी लाउरा कूपरका अनुसार, पोक्रोभ्स्कमा रुसको सुस्त प्रगतिले द्रुत गतिमा दोनेत्स्क विजयको अनुमानलाई कमजोर पार्छ ।
सैन्य दृष्टिले हेर्दा पोक्रोभ्स्क गुमाउनु युक्रेनका लागि पूर्ण विनाश भने होइन ।
रुसले ठूलो मानवीय क्षति बेहोेरेर लडाइँ जितिरहेको छ । पछिल्लो अध्ययनअनुसार, करिब १० लाख रुसी सैनिक मारिएका वा घाइते भएका छन् । यो युक्रेनीहरूले बेहोरेको क्षतिभन्दा दुई गुणा बढी हो ।
युक्रेनी कमाण्डरहरूका अनुसार, रुसको रगत बगाउने रणनीतिले समग्र युद्ध क्षमतालाई कमजोर बनाउँछ ।
यो लडाइँ अहिले निर्दयी र सुस्त युद्धमा परिणत भएको छ ।
ड्रोनहरूले खुला क्षेत्र नियन्त्रण गर्छन् । करिब १५ माइल लामो हत्या–क्षेत्र (किलिङ फिल्ड्स) बनेको छ । त्यहाँ भारी हतियारहरू चलाउन कठिन छ ।
सैनिकहरू ससाना समूहमा बाँडिएर भग्नावशेष वा खाल्डाहरूभित्र लुकेर लडिरहेका छन् ।
युक्रेन अहिले गम्भीर जनशक्ति संकटको सामना गर्दैछ ।
जेलेन्स्कीका अनुसार, पोक्रोभ्स्क नजिक रुसी सेनाको संख्या युक्रेनी सैनिकभन्दा आठ गुणा बढी छ ।
अगस्ट महिनामा डोब्रोपिलिया नजिक रुसी सैनिकहरू पसेपछि युक्रेनले पोक्रोभ्स्कबाट आफ्नो विशेष इकाइहरू हटाउनुपरेको थियो । त्यसले गर्दा उक्त क्षेत्रको रक्षा अझै कमजोर बनाएको छ ।
जाडो मौसम सुरु भएपछि युद्ध झन् कठिन हुनेछ ।
रुखहरूबाट पात झरेपछि लुकेर आक्रमण गर्न कठिन हुन्छ । हिउँ र चिसोले गर्दा रुसको गोप्य घुसपैठ गर्ने रणनीतिमा बाधा पुग्नेछ ।
तर, पोक्रोभ्स्क पतन भयो भने नजिकैको मिर्नोहराद शहर पनि घेरिने जोखिममा पर्नेछ ।
त्यस्तै, ड्रोन आक्रमणहरू अहिले स्लोभियान्स्क र क्रामाटोर्स्कमा पनि बढ्दै गएका छन् । त्यसले त्यहाँको नागरिक जीवन जोखिमपूर्ण बनाएको छ ।
प्रतिक्रिया