चीनले दियो अमेरिकालाई राहत, २४ प्रतिशत भन्सार शुल्क स्थगित

एजेन्सी । अमेरिकी सामानमाथि लगाइएको अतिरिक्त भन्सार शुल्क निलम्बन गर्ने निर्णयलाई अर्को एक वर्षका लागि बढाउने चीनले बुधबार घोषणा गरेको छ ।

गत साता चीनका राष्ट्रपति सी चिनपिङ र अमेरिकाका राष्ट्रपति डोनल्ड ट्रम्पबीच भएको वार्तामा भएको सहमतिको औपचारिक घोषणा गरिएको हो ।

दुवै नेताबीच अक्टोबर महिनाको अन्त्यमा दक्षिण कोरियाको बुसानमा वार्ता भएको थियो । त्यसले पछिल्ला महिनाहरूमा भएका धेरै चरणका व्यापारिक छलफलहरूपछि संवेदनशील व्यापार युद्धविरामलाई एक वर्षका लागि थप विस्तार गरेको हो ।

चीनको वाणिज्य मन्त्रालयको वेबसाइटमा बुधबार प्रकाशित विज्ञप्तिअनुसार, अमेरिकी सामानमाथिको २४ प्रतिशत भन्सार शुल्क अर्को एक वर्षका लागि निलम्बन गरिएको छ भने १० प्रतिशत शुल्क यथावत रहनेछ ।

यो निर्णय चीन–अमेरिका आर्थिक तथा व्यापारिक परामर्शमा बनेको सहमतिअनुरूप लिइएको र नोभेम्बर १० देखि लागू हुने विज्ञप्तिमा उल्लेख गरिएको छ ।

यसअघि मंगलबार राष्ट्रपति ट्रम्पले वाशिङटनको निर्णयलाई औपचारिक बनाएका थिए । त्यसअनुसार सोही मितिबाट लागू हुने गरी अमेरिकाले चिनियाँ आयातमा लगाइएको अतिरिक्त भन्सार शुल्क २० प्रतिशतबाट घटाएर १० प्रतिशतमा झार्नेछ ।

यो वर्ष विश्वका दुई सबैभन्दा ठूला अर्थतन्त्रबीचको व्यापारिक तनाव अत्यधिक बढेको छ । वाशिङटन र बेइजिङले एक–अर्काका सामानमा लगातार नयाँ भन्सार शुल्क लगाउँदै जान थालेका थिए । त्यसले गर्दा कतिपय वस्तुहरूमा दुवै देशका आयात–निर्यात कर तेहोरो अंकसम्म पुगेका थिए ।

यसले व्यापारमा ठूलो अवरोध सिर्जना गरेको थियो । पछिल्ला महिनाहरूमा उच्चस्तरीय आर्थिक वार्ताहरू भए पनि निर्यात नियन्त्रण र अन्य मुद्दाहरूमा तनाव रहँदै आएको छ ।

अर्को विज्ञप्ति प्रकाशन गरी चीनले मार्च महिनामा जारी गरेको आदेशअनुसार अमेरिकी कृषि–उत्पादनमाथि लगाइएका अतिरिक्त भन्सार शुल्क उपायहरू कार्यान्वयन नगर्ने पनि जनाएको छ ।

यो निर्णय ट्रम्प प्रशासनले फेन्टानिल नामक शक्तिशाली नशालु पदार्थका विषयमा बेइजिङको व्यवहारका कारण चिनियाँ सामानमाथि थप भन्सार शुल्क दोब्बर गरेपछि लिइएको थियो । अब त्यो दर पुनः १० प्रतिशतमा झर्नेछ ।

त्यसअघि बेइजिङले अमेरिकी कुखुराको मासु, गहुँ, मकै र कपासमा १५ प्रतिशत र सोयाबिन, पोर्क, गोमांस, दुग्धजन्य पदार्थ र अन्य कृषि–उत्पादनमा १० प्रतिशत अतिरिक्त शुल्क लगाएको थियो ।

यी कदमहरूले अमेरिकी कृषकहरूलाई गम्भीर असर पारेका थिए । किसानहरू ट्रम्पको राजनीतिक आधारका रूपमा हेरिन्छन् । गत वर्ष मात्र अमेरिकाको सोयाबिन निर्यातको आधाभन्दा बढी चीन पुगेका थिए तर व्यापारिक विवाद गहिरिएपछि बेइजिङले सबै अर्डर स्थगित गरेको थियो ।

वार्तापछि बेइजिङले दुर्लभ खनिज पदार्थको निर्यातमा लगाइएका प्रतिबन्धहरू पनि एक वर्षका लागि निलम्बन गर्ने सहमति जनाएको छ ।

दुर्लभ खनिज पदार्थहरू चीनद्वारा विश्वव्यापी रूपमा प्रभुत्वमा रहेका रणनीतिक क्षेत्र हुन् । त्यसको प्रयोग रक्षा, मोटरगाडी र इलेक्ट्रोनिक्स उद्योगमा अत्यावश्यक हुन्छ ।

यसको प्रतिफलस्वरूप वाशिङटनले पनि कालोसूचीमा परेका विदेशी कम्पनीका सहायक संस्थाहरूमाथि लागू गरेको एन्टिटी लिस्ट निर्यात प्रतिबन्धलाई एक वर्षका लागि स्थगित गर्ने घोषणा गरेको छ ।

त्यस्तै, दुवै देशबीच जहाज निर्माण क्षेत्रमा चलेको शुल्क युद्ध पनि एक वर्षका लागि रोक्ने सहमति भएको छ । यसअघि दुवै पक्षले एक–अर्काका जहाजहरूमाथि बन्दरगाह शुल्क लगाएका थिए ।