चैत तेश्रो साता कफी फेस्टिभल एण्ड च्याम्पियनसिप २०८१ आयोजना हुने

काठमाडौं । नेपाल कफी व्यवसायी महासंघको आयोजनामा ललितपुरमा चैतको तेश्रो साता नेपाल कफी फेस्टिभल एण्ड च्याम्पियनसिप २०८१ आयोजना हुने भएको छ ।

कृषि तथा पशुपन्छी विकास मन्त्रालय, राष्ट्रिय चिया तथा कफी विकास बोर्ड, नेपाल पर्यटन वोर्ड, युरोपियन युनियन तथा कफी क्षेत्रका उद्योगहरुको सहकार्यमा यो फेस्टिभल आयोजना गरिएको हो ।

कफी उद्योगको मूल्य शृङखला, अवसरहरुको खोजी, ज्ञान बाँडन र कफी क्षेत्रका विकास प्रर्वद्धन गर्ने उद्देश्यले यो फेस्टिभलको आयोजना गरिएको महासंघको महासचिब सन्तोष पोखरेलले जानकारी दिए ।

फेस्टिभलको कार्यक्रम संयोजकसमेत रहेका पोखरेलका अनुसार यो फेस्टिभल आगामी चैत २१ गतेदेखि २३ गतेसम्म ललितपुरको सानेपास्थित हेरिटेज गार्डेनमा आयोजना गरिएको छ ।

फेस्टिभलमा आन्तरिक तथा वाह्य बजार प्रर्वद्धन, उद्यमी व्यवसायीको उत्पादन, सेवाको प्रर्दशनी, कफीको राष्ट्रिय विद्यागत प्रतिस्पर्धा र पुरस्कार (क्याफे वारिस्ता, लाते अट र ब्रुइङ्ग ) लगायतका बिषयमा अवलोकनकर्तालाई जानकारी गराउने व्यवस्था गरिएको छ । प्रदर्शनीमा कफीसम्बन्धि विभिन्न उपकरण, विभिन्न प्रकारका कफी, कफीका परिकार, कृषि तथा क्याफे स्थापनाका लागि आवश्यक मेसिनरीहरु, रोस्टिङ प्रविधिहरु, प्याकेजिङग समानहरु राखिने व्यवस्था गरिएको छ ।