अध्यादेशबारे उठेका प्रश्नको जवाफ दिँदै अर्थमन्त्रीले भने: संसद्लाई कुण्ठा व्यक्त गर्ने थलो नबनाऔं

287
Shares

काठमाडौं । उपप्रधान तथा अर्थमन्त्री विष्णु प्रसाद पौडेलले संसद्लाई स्वस्थ बहस र विचार विमर्शको मञ्च बनाउनुपर्ने उल्लेख गर्दै कुण्ठा व्यक्त गर्ने थलो नबनाउन आग्रह गरेका छन् ।

बुधबार प्रतिनिधिसभामा आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेशबारे उठेका प्रश्नहरूको जवाफ दिने क्रममा उनले यस्तो धारणा व्यक्त गरेका हुन्।

‘सदन कुण्ठा पोख्ने होइन, विचार राख्ने थलो हो। यसलाई निरर्थक आरोप–प्रत्यारोपको स्थान नबनाऔं,’ उनले भने ।

त्यसैगरी, सरकारले अध्यादेश ल्याउनु स्वेच्छाचारी वा निरंकुश प्रवृत्तिको संकेत होइन भन्ने प्रष्ट पार्दै उनले थपे, ‘सरकारले आवश्यकताका आधारमा सदनमा अध्यादेश ल्याएको हो। दुनियाँभर यस्तो अभ्यास गरिन्छ। यदि संसद्मा विधेयक प्रस्तुत गर्नु र छलफल गर्नु नै निरंकुशता हो भने लोकतन्त्रको परिभाषा खोज्न कहाँ जाने ?’

उनले लोकतन्त्रको गलत व्याख्या नगर्न आग्रह गरे।