श्रीलङ्काका पूर्वराष्ट्रपति रनिल विक्रमासिङ्घे आज नेपाल आउँदै

काठमाडौं । श्रीलङ्काका पूर्वराष्ट्रपति रनिल विक्रमासिङ्घे आज नेपाल आउने भएका छन् ।

उनी निजी भ्रमणका लागि नेपाल आउन लागेको परराष्ट्र मन्त्रालयले बताएको छ । उनी आज दिउँसो २ बजेतिर त्रिभुवन अन्तर्राष्ट्रिय विमानस्थल, काठमाडौँ आइपुग्ने बताइएको छ ।

मन्त्रालयले उनलाई पूर्वराष्ट्रपतिका रूपमा भ्रमणका क्रममा शिष्टाचार र सुरक्षाको प्रबन्ध गर्ने जनाएको छ । अन्य भेटघाट र भ्रमण उनले आफ्नै हिसाबले निजी रूपमा गर्ने बताइएको छ ।

पूर्वराष्ट्रपति विक्रमासिङ्घे नेपाल भ्रमणका क्रममा लुम्बिनीसमेत जाने कार्यक्रम रहेको छ । भ्रमण सम्पन्न गरी उनी यही पुस १७ गते स्वदेश फर्किने छन् ।