सुदूरपश्चिमका प्रशिक्षक टमाटा भन्छन्ः नेपाली क्रिकेटले जित्यो

काठमाडौं । नेपाल प्रिमियर लिग (एनपीएल) टी–ट्वान्टी क्रिकेटको उपाधि जित्न नसकेपछि प्रशिक्षक जगत टमाटाले हार र जितभन्दा पनि नेपाली क्रिकेटले जितेको बताएका छन् ।

प्रतियोगिताको उपाधि होडमा भएको सुदूरपश्चिम फाइनल खेलमा जनकपुर बोल्ट्ससँग पराजित भएको थियो । प्रतियोगिताको दुई खेलमा पराजित जनकपुरले फाइनलमा जित निकाल्न सफल भयो ।

‘जित भयो या हार भयो भन्ने कुराको पछि लाग्न चाहन्न । तर, समग्रमा नेपाली क्रिकेटले जितेको छ । म त्यसैमा खुसि छु । उपाधि जित्न नसक्दा दुःख त लागिहाल्छ नै,’ प्रशिक्षक टमाटाले भने ।

त्रिवि क्रिकेट मैदानमा सुदूरपश्चिमले दिएको १८५ रनको लक्ष्य पछ्याएको जनकपुरले १८ ओभर २ बलमा ५ विकेट गुमाउँदै पूरा गरेको थियो । प्रशिक्षक टमाटाले पहिले ब्याटिङ गर्दा पछिल्लो पाँच ओभरमा रन नबन्दा पराजित हुन पुगेको बताए ।

‘हामी २० रनले पछि भयौं । पछिको पाँच ओभरमा जति रन बन्नु परेको थियो । त्यति बन्न सकेन त्यसैले हार ब्यहोर्नु पर्यो,’ टमाटाले भने ।