दबाबपूर्ण खेलमा रोहित र जाफरको अर्धशतक, चितवनलाई १६८ रनको लक्ष्य

काठमाडौं । कप्तान रोहित कुमार पौडेल र साड विन जाफरको अर्धशतकको सहयोगमा लुम्बिनी लायन्सले नेपाल प्रिमियर लिग (एनपीएल) अन्तर्गत आफ्नो पाँचौं खेलमा चितवन राइनोजलाई १६८ रनको लक्ष्य दिएको छ ।

त्रिवि क्रिकेट मैदानमा टस हारेर पहिले ब्याटिङ गरेको लुम्बनीले निर्धारित २० ओभरमा ६ विकेट गुमाउँदै १६७ रन बनायो ।लुम्बिनीका लागि रोहितले अर्धशतक बनाए । उनले ५७ बलमा ६ चौका र ५ छक्काको सहयोगमा ८० रन बनाए ।

त्यस्तै साड विन जाफरले पनि ५२ रनको अर्धशतकीय पारी खेले । उनले ३५ बलमा ४ चौका र १ छक्का प्रहार गरे । चितवनका लागि रिजन ढकाकाले ३ विकेट लिए । त्यस्तै कुशल मल्ल र रन्जित कुमारले एक एक विकेट लिए ।

आजको खेल लुम्बिनीलाई जित्नै पर्नेछ । प्रतियोगितामा हालसम्म जित निकाल्न नसकेको लुम्बिनी आजको खेलमा पराजित भए प्रतियोगिताको क्वालिफायरमा पुग्ने मौकाबाट बाहिरिनेछ ।

यता चितवन प्रतियोगितामा ४ खेलबाट ३ खेलमा जित निकाल्दै ६ अंकका साथ तालिकाको तेस्रो स्थानमा छ ।