भुटानका राजा काठमाडौं आउँदै

काठमाडौं । भुटानका राजा जिग्मे खेसार नाम्ग्याल वाङचुक यही मंसिर २१ गते शुक्रबार नेपाल भ्रमणका लागि काठमाडौं आउँदैछन् । शुक्रबार बिहान जिग्मे काठमाडौंस्थित त्रिभुवन अन्तर्राष्ट्रिय विमानस्थलमा अवतरण गर्ने तालिका छ ।

शुक्रबार काठमाडौंमा केही घन्टा बिताएर सोही दिन भारत जाने बताइएको छ । तर काठमाडौं बसाइको अवधिमा उनले ककसलाई भेट गर्ने भन्नेबारे यकिन भइसकेको छैन ।

भुटानी राजाको काठमाडौं भ्रमणलाई लक्षित गर्दै सरकारले सुरक्षा निकायलाई सतर्क रहन पनि निर्देशन दिइसकेको छ । उनको स्वागतका लागि नेपाली सेनाले सैन्य प्रस्तुती पनि दिने बताइएको छ ।

काठमाडौं बसाइको क्रममा भेटको तालिका यकिन नभए पनि जिग्मेले बौद्ध र स्वयम्भुनाथ अवलोकन गर्ने तालिका रहेको छ । साथै काठमाडौंबाट फर्किएपछि भारतको दिल्लीमा उनले भारतीय प्रधानमन्त्री नरेन्द्र मोदीसँग भेट गर्ने तालिका छ । यसअघि नेपालका पूर्वराजा ज्ञानेन्द्र शाह पनि भुटान भ्रमणमा गएका थिए ।