चितवन राइनोजको विजयी सुरुवात, काठमाडौं गुर्खाज ५ विकेटले पराजित

काठमाडौं । चितवन राइनोजले नेपाल प्रिमियर लिग (एनपीएल) मा विजयी सुरुवात गरेको छ । सोमबार भएको पहिलो खेलमा चितवनले काठमाडौं गुर्खाजलाई ५ विकेटले पराजित गर्दै २ अंक जोडेको हो ।

काठमाडौंले दिएको ११२ रनको लक्ष्य चितवनले १७ ओभरमा ५ विकेट गुमाएर पूरा गर्यो ।

चितवनका लागि सन्तोष कार्कीले अविजित रहँदै सर्वाधिक २८ रन बनाए । उनले ३१ बलमा २ चौका र १ छक्का प्रहार गरे । लुक बेन्केन्सटेइनले २२ रन योगदान गरे भने शरद भेषावकर ११ रनमा अविजित रहे ।

काठमाडौंका लागि शाहब आलमले ३ विकेट लिए पनि चितवनलाई जितबाट रोक्न सकेनन् ।

त्यसअघि, टस हारेर पहिले ब्याटिङ गरेको काठमाडौंले सोहेन तनविरको उत्कृष्ट बलिङका कारण २० ओभरमा ९ विकेट गुमाएर मात्र १११ रन बनाएको थियो ।

काठमाडौंका सुमित महर्जनले २९ र माइकल लेभिटले २५ रन बनाए । चितवनका सोहेन तनविरले ४ ओभरमा २१ रन खर्चेर ५ विकेट लिदै उत्कृष्ट प्रदर्शन गरे ।