खुकुरी रम अब सेतो रङमा पनि
![](https://clickmandu.com/wp-content/uploads/2022/09/Khukri-White-Packshot-Enhanced1-262x768.jpg)
काठमाण्डौ। संगठनात्मक क्षेत्रमा स्थापना भएको नेपालको पहिलो मदिरा उत्पादक कम्पनी ‘दि नेपाल डिस्टिलरिज’ले आफ्नो बहुचर्चित खुकुरी ब्रान्डअन्तर्गत ‘खुकुरी ह्वाइट रम’ बजारमा ल्याएको छ।
योसँगै खुकुरी ब्रान्डको पोर्टफोलियोमा अब तीन प्रकारका रमहरु भएका छन्ः खुकुरी ट्रिपल एक्स, खुकुरी स्पाइस्ड र खुकुरी ह्वाइट रम।
खुकुरी ह्वाइट रम एक स्पष्ट पारदर्शी रम हो, जसले गर्मीयामका पेयहरुको माग पूरा गर्नेछ। यसलाई बरफ (आइस) हालेर पिउन सकिन्छ, वा कोला वा जुसजस्ता मिक्सरहरुसँग पनि पिउन सकिन्छ। ‘खुकुरी ह्वाइट रम’लाई ककटेल बनाउन व्यापक रुपमा प्रयोग गर्न सकिन्छ।
मोहितो लोकप्रिय ककटेलमध्ये एक हो, जुन ह्वाइट रम प्रयोग गरी बनाइन्छ। ह्वाइट रमको स्थानीय उत्पादन नहुने र आयातित मदिरामा प्रतिबन्धका कारण नेपालका बारहरुले हिजोआज मोहितो बनाउन अन्य पारदर्शी र सेतो रक्सीको प्रयोग गर्नुपर्ने बाध्यता छ।
तर अब नेपाली उपभोक्ताहरुले फेरि ह्वाइट रमसँग मोहितो पिउन सक्नेछन्। खुकुरी रम मोहितो पारखीहरुलाई अरु कुनै तरल पदार्थ होइन, रममा बनेको मोहितो नै अर्डर गर्न समेत प्रोत्साहन गर्दछ।
नेपालको मौलिक स्वादलाई कायमै राखेर कम्पनीले खुकुरीको ह्वाइट रम तयार गर्न २ वर्षभन्दा बढी समय लगाएको थियो। ह्वाइट रमलाई विश्वस्तरीय तरल पदार्थका रुपमा विकास गर्नुअघि व्यापक परीक्षण र प्रतिक्रियाको शृंखलाहरु सञ्चालन गरिएका थिए। यो क्रममा नेपालका सबै प्रिमियम बार र रेस्टुरेन्टहरुबाट अपार समर्थन र सहयोग प्राप्त भएको थियो।
खुकुरी रमको ब्राण्ड पोर्टफोलियोमा विश्वस्तरीय ह्वाइट रम थपिएकोमा आफूलाई गर्व महसुस भएको ‘दि नेपाल डिस्टीलरिज’का महाप्रबन्धक शुभाष लामिछानेले बताए।
उनले भने, ‘हामीले रमको आधारभूत पोर्टफोलियो अब पूर्ण गरेका छौँ। हामीले उत्पादन गर्दै आएका रमका अन्य भेराइटी निर्यात गरेजस्तै ह्वाइट रम पनि निर्यात गरी विदेशी मुद्रा आर्जन हुने र यसबाट राष्ट्रिय अर्थतन्त्रलाई थोरै भए पनि टेवा पुग्ने विश्वास लिएका छौँ।’