भोजपुरमा एमाले कांग्रेस तीन-तीन र माओवादी दुई ठाउँमा विजयी

भोजपुर । भोजपुर जिल्लाको ९ वटै स्थानीय तहको निर्वाचनको मतगणना सम्पन्न भएको छ । यहाँको दुई नगरपालिका र सातवटा गाउँपालिकाको अन्तिम मत परिणाम सार्वजनिक भएको हो ।

यहाँ एमाले र कांग्रेसले तीन÷तीन, नेकपा (माओवादी केन्द्र) दुई र एक स्थानीय तहमा स्वतन्त्र उम्मेदवार विजयी भएका छन् । षडानन्द नगरपालिका, पौवादुङमा गाउँपालिका र हतुवागढी गाउँपालिकामा एमालेले, भोजपुर नगरपालिका, अरुण र टेम्केमैयुङ गाउँपालिकामा गठबन्धनको तर्फबाट कांग्रेसले जित हासिल गरेको छ । आमचोक र रामप्रसाद राई गाउँपालिकामा माओवादीले जित हासिल गरेको छ ।

आमचोकमा माओवादी एक्लै लडेको हो, भने रामप्रसाद राईमा कांग्रेस माओवादीले गठबन्धन गरेका थिए । साल्पासिलिछो गाउँपालिकामा भने स्वतन्त्र उम्मेदवार विजयी बनेका छन् । एमालेले टिकट नदिएपछि स्वतन्त्र उठेका दौलथ कुलुङ विजयी भए । भोजपुरमा कांग्रेसबाट मेयरमा कैलाशकुमार आले पाँच हजार ६१५ मत प्राप्त विजयी बनेका छन् । उनका निकटतम प्रतिद्वन्द्वी एमालेका तामाङले पाँच हजार १०० मत ल्याएका छन् ।

त्यस्तै उपमेयरमा एमालेकी निर्मला शेर्पा विजयी भएकी छिन् । उनले रुख चिह्नबाट उम्मेदवारी दिएकी नेकपा (एकीकृत समाजवादी)की ममिता राईलाई पाँच हजार ५०० पराजित भएकी छिन् । निकटतम प्रतिद्वन्द्वी राईले ५ हजार १३३ मत प्राप्त गरेकी छिन् । षडानन्द नगरपालिकामा गठबन्धनका उम्मेदवारलाई भारी मतान्तरले हराउँदै एमालेका सुरेन्द्र कुमार उदास विजयी भउका छन् । उनले छ हजार ७७२ मत ल्याएका छन् ।

यस्तै गठबन्धनका उम्मेदवार कांग्रेसका बिरवल राईले ५ हजार ७५७ मत ल्याएर पराजित भएका छन् । उपमेयरमा सत्तारुढ गठबन्धनकी माओवादी उम्मेदवार प्रमिला राई विजयी बनिन् । उनले ७ हजार २५७ मत ल्याएर विजयी बनेकी छिन् । उनकी निकटतम् प्रतिद्वन्द्वी एमालेकी मेरीका राईले चार हजार ३५८ मत प्राप्त गरेकी छिन् ।

पौवादुङमा गाउँपालिका अध्यक्ष–उपाध्यक्ष दुवै पद एमालेले जितेको छ । यहाँ एमालेका किरण राई भारी मतान्तरका साथ अध्यक्षमा विजयी बने । उनले दुई हजार ४९९ मत प्राप्त गर्दा माओवादीका नगेन्द्र भुजेल ले एक हजार ६८८ मत र कांगेसका टेक नरसिं कार्कीले एक हजार ३७१ मत ल्याए । उपाध्यक्षमा एमालेकै ज्योत्सना राई दुई हजार ४०६ मत ल्याएर विजयी बनेकी छिन् । उनकी निकटतम प्रतिद्वन्द्वी माओवादीकी सम्झना राईले एक हजार ७६९ र कांग्रेसकी रामकुमारी राईले एक हजार ३८७ मत प्राप्त गरेकी छिन् ।

हतुवागढीमा एमालेका प्रेमकुमार राई विजयी बनेका छन् । उनले गठबन्धनका उम्मेदवार कांग्रेसका गजेन्द्रकुमार कार्कीलाई हराउँदै दोस्रो कार्यकालका लागि निर्वाचित बने । उनले कांग्रेसका कार्कीलाई अध्यक्ष पदमा ६८९ मतले हराए । राईले चार हजार ४२ मत पाएका छन् भने कार्कीले तीन हजार ३५३ मत ल्याएर पराजित भए । उपाध्यक्षमा गठबन्धनको तर्फबाट माओवादीकी सुनिता किराती ३ हजार ७०७ मत विजयी बने । राईकी निकटतम प्रतिस्पर्धी एमालेकी कमला राईले तीन हजार ६११ मत ल्याएर पराजित भइन् ।

टेम्केमैयुङमा अध्यक्षमा गठबन्धनको तर्फबाट कांग्रेसका सरोज बस्नेत विजयी बने । उनले तीन हजार ९८० मत ल्याएर विजयी बने भने एमालेका ध्रुवराज राई तीन हजार २८८ मत ल्याएर पराजित भए । उपाध्यक्षमा एमालेकी रमादेवी राई विजयी बनिन् । राईले तीन हजार ३८८ मत ल्याएकी छिन् । उनकी निकटतम प्रतिद्वन्द्वी जनता समाजवादीकी इन्द्रवती राई तीन हजार २९८ मत ल्याएर पराजित बनिन् ।

अरुणमा काङ्ग्रेसले जित हासिल गरेको छ । यहाँ अध्यक्षमा दुई हजार ८८७ मत ल्याएर शालिकराम खत्री र तीन हजार मत ल्याएर उपाध्यक्षमा वितिना ढकाल विजयी बनिन् । खत्रीका निकटतम प्रतिद्वन्द्वी एमालेका नारायण घिमिरेले दुई हजार ४२४ मत ल्याए । उपाध्यक्षकी प्रत्यासी कविता राईले दुई हजार ५४४ मत ल्याए ।

रामप्रसाद राईमा अध्यक्षमा गठबन्धनका साझ उम्मेदवार माओवादीका थामबहादुर राई तीन हजार ७० मत ल्याएर विजयी बने । राईका निकटतम प्रतिद्वन्द्वी एमालेका बलराम राई दुई हजार ८५१ मत ल्याएर पराजित बने । उपाध्यक्षमा कांग्रेसका वीरेन्द्र राई तीन हजार ५७७ मत ल्याएर विजयी बने भने उनकी निकटतम प्रतिद्वन्द्वी एमालेकी कमला राईले दुई हजार २१४ मत ल्याइन्् ।

आमचोकमा माओवादीले जित हासिल गरेको छ । अध्यक्षमा तीन हजार ६८६ मत ल्याएर अशोक राई विजयी बने भने एमालेका वसन्त राईले तीन हजार २५८ मत ल्याए । उपाध्यक्षमा सीता राई तीन हजार ५६१ मत ल्याएर विजयी बनिन् । उनका निकटतम प्रतिद्वन्द्वी छिरिङ शेर्पाले तीन हजार २४४ मत ल्याइन् ।

साल्पाछिलिछोमा स्वतन्त्र उम्मेदवार विजयी बने । यहाँ एमालेले टिकट नदिएपछि स्वतन्त्र उम्मेदवारी दिएका दौलथ राई एक हजार ८२४ मत ल्याएर विजयी बने । यहाँ एमालेका शान्तिबहादुर अधिकारीले तीन हजार ३८३ र कांग्रेसका महेश राईले तीन हजार ८६२ मत ल्याए ।

उपाध्यक्षमा कांग्रेसकी अस्मिता राई एक हजार ८६२ मत ल्याएर विजयी बनिन् । उनकी निकटतम प्रतिद्वन्द्वी एमालेकी रिता घलेले एक हजार ३९५ मत ल्र्याइन् ।

जिल्लामा ८१ ओटा वडामध्ये सबैभन्दा धेरै ३२ एमाले, २८ कांग्रेस, माओवादी १८, नेकपा (एकीकृत समाजवादी) र जनता समाजवादी पार्टीले एक÷एक र एउटा वडा स्वतन्त्रले जितेका छन् ।