लक्ष्मी बैंक २१औं वार्षिक साधारणसभा सम्पन्न, चुक्ता पुँजी ११ अर्ब ५५ करोड पुग्यो

काठमाडौं । लक्ष्मी बैंकको २१औं वार्षिक साधारणसभा बिहीबार सम्पन्न भएको छ । साधारणसभाले बैंकको चुक्ता पूँजीको ८ प्रतिशत बोनस शेयर र ३.५ प्रतिशत नगद लाभांश वितरण गर्ने प्रस्ताव पारित गरेको छ ।

बोनस सेयर पारित भएसँगै बैंकको चुक्ता पूँजी ११ अर्ब ५५ करोड रुपैयाँ पुगेको छ ।

साधारणसभाले आर्थिक वर्ष २०७७/७८ का लागि संचालक समितिको प्रतिवेदन तथा सोही आर्थिक वर्षको बैंकको वित्तीय विवरण उपर छलफल गरी स्वीकृत गरेको छ ।

आर्थिक वर्ष २०७७/७८ मा ११७ अर्ब निक्षेप र १०८ अर्ब कर्जा पुर्याएको यस बैंकको वासलातको आकार १५२ अर्ब रुपैयाँ रहेको छ । सो आवमा बैंकले १ अर्ब ५७ करोड रुपैयाँ खुद नाफा कमाएको थियो ।

सन् २००२ मा स्थापना भएको बैंकका ५० जिल्लामा १४० शाखा सञ्चालनमा छन् । त्यस्तै, १७० वटा एटीएम, २५ सय रेमिट्यान्स एजेन्ट र ६३ वटा शाखारहित बैंकिङ एजेन्ट छन् ।