युवराज खतिवडाले घटाएको चकलेटको भन्सार शुल्क बिष्णु पौडेलले बढाएर ४० प्रतिशत बनाए

काठमाडौं ।चालु आर्थिक वर्षको आर्थिक ऐन मार्फत सरकारले चकलेटमा लाग्ने भन्सार महशुल ४० प्रतिशतबाट घटाएर ३० प्रतिशत पुर्याएपछि तत्कालिन अर्थमन्त्री डा. युवराज खतिवडाको चर्को आलोचना भयो ।

विदेशी चकलेट आयात गर्ने व्यवसायिक घराना विशाल ग्रुपलाई सरकारले गरेको उक्त निर्णयले सबैभन्दा धेरै फाइदा पुगेको थियो । जसकारण सरकार र खतिवडाले आलोचना खेपे ।

अघिल्लो वर्ष चकलेट, कोका पाउडर, सिरप, क्रिमजस्ता चकलेटजन्य वस्तुहरुमा ४० प्रतिशत भन्सार लाग्ने गरेकोमा सरकारले चालु आर्थिक वर्षको आर्थिक ऐनमार्फत घटाएर ३० प्रतिशतमा झारेको थियो ।

तर अहिलेको सरकारले फेरी त्यसलाई बढाएर ४० प्रतिशत नै पुर्याएको छ ।

चकलेट र चकलेटजन्य वस्तुको आयातमा लाग्ने भन्सारको दरलाई घटाउने खतिवडाको निर्णयलाई अर्थमन्त्री विष्णु प्रसाद पौडेलले उल्टाएका हुन् ।