१ अर्ब ३२ करोड बिगो दावीसहित प्रसादविरुद्ध राजस्व अनुसन्धान विभागद्वारा मुद्दा दर्ता

काठमाडौं । झुट्टा तथा नक्कली मूल्य अभिवृद्धि कर विजक प्रयोग गरी राजस्व छली गर्ने रामकिशोर प्रसादसहित २८ जना विरुद्ध राजस्व अनुसन्धान विभागले मुद्दा दायर गरेको छ ।

सर्लाही घर भइ हाल काठमाडौं सितापाइलास्थित पद्म कोलनीमा बस्ने रामकिशोर प्रसाद सहित २८ जना विरुद्ध १ अर्ब ३२ करोड ४६ लाख १२ हजार ५६५ रुपैयाँको बिगो असुल गरी कैद सजाय माग गर्दै विभागले उच्च अदालत पाटनमा मुद्दा दायर गरेको हो ।

प्रसादको कम्पनी मोहन ट्रेड इन्टरनेशनलसहित अन्य २६ वटा फार्म मिलेर आर्थिक अवस्था कमजोर भएका मजदुरलगायतका व्यक्तिको नाममा दर्ता गरी फर्म सञ्चालन तथा बैंक खाता सञ्चालन गरेको विभागको आरोप छ ।

उनीहरुले झुट्टा तथा नक्कली बिक्री बिजक जारी गरी आर्थिक वर्ष २०७१÷७२ देखि २०७४÷७५ सम्ममा मूल्य अभिवृद्धि कर ४३ करोड ८१ लाख ८० हजार ३७८ रुपैयाँ, आयकरतर्फ ८६ करोड ५६ लाख १ हजार ७८५ रुपैयाँ र लाभांश करतर्फ २ करोड ८ लाख ३० हजार ४०२ रुपैयाँ राजस्व चुहावट गरेको विभागको आरोप छ ।