कैलालीमा जिपलाइन शु्रू भएपछि पर्यटकको आकर्षण बढ्यो

कैलाली । कैलालीको महोन्याल गाउँपालिकास्थित कर्णाली नदीमा ‘जिपलाइन’ सञ्चालनमा आएपछि पर्यटकको आकर्षण बढ्न थालेको छ ।

सुदूरपश्चिम प्रदेशको प्रवेशद्वारसमेत रहेको यस ठाउँमा कोभिड संक्रमणको जोखिमको समयमा पनि जिपलाइनको आनन्द लिन पर्यटकहरु आउने गरेका छन् ।

कैलालीको महोन्याल गाउँपालिका वडा नं. ७ पितमारीस्थित कर्णाली नदीको किनारमा जिपलाइन सेवा सञ्चालनमा आएको छ । अन्तर्राष्ट्रिय मापदण्ड अनुसारको करिब १३० मिटर लामो लाइन निर्माण भएपछि जिपलाइन सेवा सञ्चालनमा आएको हो ।

साहसिक खेलका रुपमा रहेको जिपलाइनको मज्जा लिन अहिले दैनिकरुपमा पर्यटकको भिड लाग्ने गरेको छ ।

२०७६ सालको माघ महिनादेखि जिपलाइन सञ्चालनमा आएपनि कोभिड संक्रमणको जोखिमका कारण बन्द थियो । चिसापानी एड्भेञ्चर रिसोर्टले करिब १० लाख रुपैयाँ लागतमा यो जिपलाइन सेवा सञ्चालनमा ल्याएको हो ।

यस क्षेत्रमा घुम्न आउने पर्यटकका लागि साहसिक खेलको मनोरञ्जन दिने उद्देश्यले जिपलाइन सेवा सञ्चालनमा ल्याइएको सञ्चालक तपेन्द्र रावलले बताए ।

जिपलाइनको अनुभव लिन आन्तरिक तथा बाह्य पर्यटक आउने गरेका छन् । साहसिक खेल जिपलाइन खेल्नका लागि अहिले दैनिक २ सय देखि ३ सयको संख्यामा पर्यटकहरु आउने गरेका छन् ।