व्यवसायी फकाउँदै अर्थमन्त्री पौडेलले भने- निजी क्षेत्रको मनोवल नबढाइ अर्थतन्त्र गतिशिल हुँदैन

काठमाडौं । अर्थमन्त्री विष्णुप्रसाद पौडेल उद्योगी व्यवसायी फकाउन लागी परेका छन् । यसअघिका अर्थमन्त्री डा. युवराज खतिवडाका कारण निराश बनेका व्यवसायीलाई फकाएर अर्थतन्त्र गतिशिल बनाउन पौडेल लागेका छन् ।

उनले सरकारले निजी क्षेत्रको मनोबल र आत्मविश्वास बढाएर मात्रै काम गर्नुपर्ने तर्क गरेका छन् ।

नेपाल चेम्बर अफ कमर्सका अध्यक्ष राजेशकाजी श्रेष्ठ लगायतको प्रतिनिधिमण्डलसँगको भेटमा अर्थमन्त्री पौडेलले निजी क्षेत्रलाई सहयोग र प्रोत्साहन गरेर कोभिड–१९ ले पारेको प्रतिकूलतालाई न्यूनीकरण गर्दै अर्थतन्त्रको पुनरउत्थान गर्न सकिने बताए ।

उनले त्यसका लागि सरकार र निजी क्षेत्र मिलेर अघि बढ्न आवश्यक रहेको धारणा व्यक्त गरे ।

अर्थमन्त्री पौडेलले प्रतिकूल अवस्थामा स्वास्थ्य सुरक्षाका सबै मापदण्डलाई विशेष ध्यान दिएर व्यापार, व्यावसाय र उद्योगहरु चलाई अर्थतन्त्रलाई चलायमान बनाउन आग्रह गरे ।

उनले बजेटमा उल्लेख गरिएका राहत र पुनरउत्थानका कार्यक्रमहरुलाई सबैको साथ लिएर कार्यान्वयन गर्ने बताए ।

अर्थमन्त्री पौडेलले सरकारले निजी क्षेत्रका समस्या र कठिनाइलाई बुझ्ने र निजी क्षेत्रले सरकारको सीमा र भूमिकालाई बुझेर अघि बढ्दा धेरै समस्या समाधान सकिने धारणा व्यक्त गरे ।

नेपाल चेम्बर अफ कमर्सका अध्यक्ष राजेशकाजी श्रेष्ठले क्रयशक्ति बढाइ आर्थिक क्षेत्रलाई चलायमान बनाउन, व्यापार र उद्योग क्षेत्रलाई सहजरुपमा सञ्चालन गर्ने वातावरण तयार पार्न आग्रह गरे ।

नेपाल चेम्बर अफ कमर्सले अर्थमन्त्री पौडेललाई २२ बुँदे सुझाव दिएको छ ।