अर्थमन्त्रालयका सल्लाहकार भन्छन्- पूँजीगत खर्च बढाउन चुनौती, पुरक बजेट आवश्यक छैन

काठमाडौं । अर्थमन्त्री विष्णु पौडेलका आर्थिक सल्लाहकार डा. प्रकाश श्रेष्ठले पूँजीगत खर्च बढाउन चुनौति रहेको बताएका छन् ।

अधिकांश आयोजनाहरुको कार्यान्वयन पक्ष कमजोर रहेकाले बजेट खर्च बढाउन चुनौति रहेको श्रेष्ठले बताए । न्यूज एजेन्सी नेपालसँग कुराकानी गर्दै आर्थिक सल्लाहकार श्रेष्ठले अधिकांश आयोजनाहरुको कार्यान्वयन पक्ष कमजोर हुँदा पूँजीगत खर्च बढाउन चुनौतिपूर्ण रहेको बताए ।

अहिले पनि तीन वटै तहका सरकारले विभिन्न आयोजनामा खर्च गर्नुपर्ने २ खर्ब भन्दा बढी रकम खर्च हुन नसकेकोले चुनौति रहेको उल्लेख गरे ।

पूँजीगत खर्च बढाउने तर्फ मन्त्रालयले विशेष ध्यान दिएको उनको भनाइ छ । यस्तै अहिले पुरक बजेट ल्याउनुपर्ने आवश्यकता नरहेको श्रेष्ठले स्पष्ट पारे । बजेटलाई परिमार्जन गर्ने भन्दापनि कार्यान्वयन पक्षमा जोड दिइएको उनले भनाइ छ ।

अहिलेकै सरकारले ल्याएको बजेट भएकाले परिमार्जन गर्ने भन्दापनि प्रभावकारी कार्यान्वयनमा जोड दिनुपर्ने उनको तर्क छ । विभिन्न क्षेत्रमा पुरक बजेट ल्याउने चर्चा भएपनि आवश्यकता नरहेको स्पष्ट पारे ।

चालु आर्थिक वर्षको दोस्रो त्रैमास भर्खरै सुरु भएकाले अहिले नै बजेटमाथि समिक्षा गर्ने बेला भइनसकेको उनको भनाइ छ ।