खुले होटल,खुलेनन् होमस्टे

काठमाडौं । ४महिनापछि सूर्योदय नगरपालिकास्थित श्री अन्तुका होटल र कटेज खुल्न थालेका छन् । पछिल्लो समय पर्यटकको आकर्षण बनेको होमस्टे भने यो महिना भर नखुल्ने भएका हुन् ।

कोरोनाको त्रास रहे पनि व्यवसाय संकटमा परेपछि सामान्यीकरणका लागि होटल र कटेज खुल्न थालेका हुन् । कोरोना जोखिम हुन नदिन आवश्यक शर्तहरू पूरा गर्नुपर्ने नियम राखिएको छ । श्रीअन्तु होमस्टे व्यवसायी सङ्घका सचिव रुद्र घिमिरेले भने -हामीले केन्द्रको निर्देशन मान्दै होटल खोलेका हौँ, तर एक होटल/कटेजमा एक दिनमा एक जना मात्र पाहुना राख्नुपर्ने शर्त छ ।

यसका स्थानीय व्यक्तिलाई मात्र बस्ने दिने नियम बनाइएको छ । शंकास्पद र टाढाको व्यक्ति राख्न नमिल्ने नियम बनाइएको उनले बताए ।
व्यवसाय नै ठप्प भएर आर्थिक स्थिति नाजुक बनेपछि खोल्नुपर्ने बाध्यता आइलागेको उनको भनाइ छ ।

तर होटल र कटेजमा पाहुनालाई स्यानिटाइजर दिने, ज्वरो मापन गर्नुपर्ने नियम राखिएको छ ।

उनले भने –हामीले होटल÷कटेज खोल्यौ भन्ने सन्देश मात्र दिएका हौँ । होटल र कटेज खुले पनि अन्तुका होमस्टे भने साउनभर नखुल्ने भएका छन् । होमस्टे एशोसिएसन नेपालले खुनाउन अनुरोध गरे पनि कोरोनाको जोखिमले होमस्टे नखुलेका हुन् ।

होमस्टे खुल्नेबित्तिकै ठूलो संख्यामा पर्यटक आउन सक्ने भएकाले होमस्टे १५ दिनपछि मात्र खुल्ने जनाइएको छ ।

श्री अन्तुडाँडा सामुदायिक होमस्टे अन्तुका अध्यक्ष धनबहादुर आलेका अनुसार आगामी भदौ १ गतेबाट मात्र होमस्टे खुलाउने निर्णय भएको छ ।

सूर्योदय नगरपालिकास्थित अन्तु, समालबुङ क्षेत्रमा ७६ होमस्टे र ३३ भन्दा बढी होटल/कटेज छन् । अन्तुडाडाँडा सामुदायिक होमस्टेमा ६३ र अन्तुपोखरी सामुदायिक होमस्टेमा १३ होमस्टे आबद्ध छन् ।