कोरोना भाइरसबाट नेपाल सुरक्षित, हानले भन्यो- छिट्टै ‘विशेष पर्यटन प्याकेज’ ल्याउँछाैं

काठमाडौं । पर्यटन व्यवसायीहरुले भिजिट नेपाल २०२० लाई लक्षित गरी विशेष पर्यटन प्याकेज ल्याउने घोषणा गरेका छन् ।

होटल एसोसिएसन अफ नेपालकि अध्यक्ष सिर्जना राणाले सबै सरोकारवाला निकायसँग छलफल गरी विशेष पर्यटन प्याकेज ल्याउने तयारी भइरहेको जानकारी दिइन् ।

राजधानीमा मंगलबार चीनबाट शुरु भएको कोरोना भाइरसले नेपालको पर्यटन व्यवसायमा पारेको प्रभावको विषयमा जानकारी दिन आयोजित कार्यक्रममा बोल्दै राणाले नेपाल अहिले सुरक्षित रहेको बताइन् ।

उनले पर्यटन व्यवसायी र नेपाल भ्रमण वर्ष २०२० को सचिवालय यसबाट कतिपनि विचलित नभइ भारत, बंगलादेश, मध्यपूर्ण, दक्षिण पूर्वी एसियालगायतबाट लक्ष्य अनुसारको पर्यटक ल्याउन खटिरहेको जानकारी दिइन् ।

राणाले पर्यटन स्रोत बजारका बारेमा नेपाल सरकार, हवाई कम्पनीलगायत सबै सरोकारवालाहरुसँग छलफल गरी विशेष पर्यटन प्याकेज ल्याउने तयारी भइरहेको समेत बताइन् ।

कार्यक्रममा बोल्दै नेपाल भ्रमण वर्ष २०२० सचिवालयका राष्ट्रिय संयोजक सुरज बैद्यले सरकारले छिट्टै नयाँ नीति ल्याउने र यसका लागि मन्त्रालयमा छलफल भइरहेको जानकारी दिए ।

‘कारोना भाइरसका कारण आगामी अप्रिल महिनासम्म यसले असर पार्ने देखिएको छ, नेपालमा पर्यटक ल्याउनका लागि अर्को विकल्प खोज्नु पर्ने बेला आएको छ,’ उनले भने ।

नेपाल भ्रमण वर्षको शुरुवातमै चीनमा कोरोना भाइरसको संक्रमण बढेको उल्लेख गर्दै यसबाट नेपालमा विदेशी पर्यटकको आगामनमा असर पर्ने वैद्यले बताए ।

उनले कतिपय चिनियाँ पर्यटकले काठमाडौं आउने यात्रा रद्द गरेको र यसको असर नेपालको होटल क्षेत्रमा देखिएको समेत बताए ।

‘अहिले होटल क्षेत्रमा उल्लेख्य रुपमा पर्यटकको कमी आएको छ, विशेष गरी पोखरा र सौराहका होटलमा अकुपेन्सी घटेको छ,’ हानका प्रथम उपाध्यक्ष विनायक शाहले भने ।

उनले होटलहरुमा कोरोना भाइरसबाट बच्नका लागि सबै सदस्य होटललाई पूर्वतयारीका लागि सजकता अपनाउन भनिसकिएको र होटलहरुले पनि सोही हिसाबले सर्तक रहेको जानकारी दिए ।