पुँजीकरण बढी हुने ठूला १० कम्पनीबाट चिलिमे र राष्ट्रिय बीमा कम्पनी बाहिरिए, एनआईसी र एनएमबि भित्रिए

काठमाडौं । पुँजीकरण बढी भएका १० कम्पनीबाट चिलिमे हाईड्रोपावर कम्पनी र राष्ट्रिय बीमा कम्पनी बाहिरीएका छन् भने एनआईसी एसिया बैंक र एनएमबि बैंक भित्रिएका छन् ।

अघिल्लो वर्ष बजार पुँजीकरणको पहिलो नम्बरमा नेपाल दूरसञ्चार कम्पनी पहिलो नम्बरमा रहेको थियो भने यो वर्ष पनि नेपाल दूरसञ्चार कम्पनी नै अग्रस्थानमा रहेको छ । गत वर्ष दूरसञ्चार कम्पनीको बजार पुँजीकरण १ खर्ब ८ अर्ब १५ करोड रुपैयाँ रहेको थियो ।

चालु आवको अन्तिमसम्ममा दूरसञ्चारको बजार पुँजीकरण १ खर्ब ३ अर्ब ९५ करोड रुपैयाँ रहेको छ । गत वर्षको तुलनामा यो वर्ष दूरसञ्चार कम्पनीको बजार पुँजीकरण ४.०४ प्रतिशतले घटेको छ ।

यस्तै दोस्रो स्थानमा नबिल बैंक रहेको छ । नबिल बैंकको बजार पुँजीकरण पनि गत वर्ष ७४ अर्ब ३५ करोड रुपैयाँ रहेको थियो । यो वर्षको असार मसान्तमा ७२ अर्ब ३८ करोड रुपैयाँ रहेको छ । अघिल्लो वर्षको तुलनामा २.७७ प्रतिशतले घटेको छ ।

यस्तै नेपाल इन्भेष्टमेन्ट बैंकको पनि बजाुर पुँजीकरण १.२१ प्रतिशतले घट्दा स्टयान्र्डर चार्टर्ड बैंकको भने सबै भन्दा बढी १०.७० प्रतिशतले घटेको छ ।

तर एभरेष्ट बैंकको भने बजार पुँजीकरण ०.४५ प्रतिशतले बढेको छ भने हिमालन बैंकको पनि ४.९३ प्रतिशतले बढेको छ । सबै भन्दा बढी बजार पुँजीकरण हुने १० कम्पनी मध्ये ६ नम्बरमा नेपाल लाइफ इन्स्योरेन्स रहेको छ । नेपाल लाइफको बजार पुँजीकरण ६.७७ प्रतिशतले बढेको छ ।

अघिल्लो वर्ष भन्दा बजार पुँजीकरणमा १ स्थान तल झरेको नेपाल एसबीआई बैंकको पनि १.३२ प्रतिशतले घटेको छ । चिलिमे हाईड्रोपावर र राष्ट्रिय बीमा कम्पनी ९ र १० नम्बरबाट हटेपछि ८ नम्बरमा एनआईसी एसिया बैंक र १० नम्बरमा एनएमबी बैंक बढी पुँजीकरण हुने कम्पनीको रुपमा थपिएका छन् ।

आर्थिक वर्ष २०७५/७६ मा बढी पुँजीकरण भएका १० कम्पनी