म्युचुअल फण्डको कन्तबिजोकः १३ मध्ये ३ वटाको मूल्य मात्रै आधारभूत मूल्य माथि (सूचिसहित)

काठमाडौं । सेयर बजारमा सामूहिक लगानीका लागि स्थापना भएका म्युचल फण्डहरु बुलिस ट्रेन्डमा रहोस् भन्ने आम चाहना हुन्छ ।

सुरक्षित लगानीका लागि महत्वपूर्ण मानिएका सामूहिक लगानी कोषले बजारलाई सबल र सक्षम बनाउन पनि महत्वपूर्ण योगदान दिन्छ । पछिल्ला दिनमा सेयर बजार राम्रै अंकले वृद्धि भएको छ ।

एकाध दिन केही घटबढ हुनु स्वभाविक नै हुन्छ । बजारशास्त्र र धितोपत्र बजारको प्राकृतिक नियम नै हो सेयर सामान्य अंकले बढ्नु र घट्नु पनि । संसार भर नै सेयर बजार भनेको हल्लाको बजारको रुपमा पनि चित्रण गरिन्छ ।

सामान्य घटनाले पनि बजारमा ठूलो प्रभाव पार्दछ । संसारभरको नियम नेपालमा लागू नहुने कुरै भएन ।

अमेरिकामा सामान्य घटना हुँदा त्यसको प्रभाव एशियाली सेयर बजारमा पर्दछ । यस्तै एशियामा कुनै घटना भयो भने त्यसले लण्डन स्टक एक्सचेञ्जलाई समेत प्रभाव पार्दछ । संसारभर नै सेयर बजारको गति र मति एउटै हुन्छ ।

तर नेपालमा पछिल्लो समय धितोपत्र बजारमा सेयरको अवस्था सकारात्मक दिशामा केन्द्रंीत छ । कारोवार मापक नेप्से परिसूचक बिहिबार १ हजार ३१८ को बिन्दुमा रहेको छ ।

तर सामूहिक लगानीका लागि स्थापना भएका १३ साूमूहिक लगानी कोष अर्थात् म्युचल फण्डहरुको अवस्था भने बजारको लय र गति समातेको जस्तो देखिदैन ।

नेपाल स्टक एक्सचेञ्जमा कूल १३ वटा सामूहिक लगानी कोषको कारोवार भएको छ । त्यस मध्ये ३ वटा सामूहिक लगानी कोषको मात्रै अवस्था सकारात्मक रहेको छ । ती लगानी योजनाको मूल्य मात्रै दोस्रो बजारमा आधारभूत मूल्य भन्दा माथि रहेको छ ।

१० वटा सामूहिक लगानी कोषको अवस्था भने दुरुहपूर्ण रहेको छ । ती योजनाको दोस्रो बजार मूल्य आधारभूत मूल्य भन्दा तल रहेको छ । सिद्दार्थ इक्विटी ओरियन्टेड स्किमको प्रतिइकाइ मूल्य १० रुपैयाँ ५० पैसा छ ।

यस्तै एनएमबी सुलभ इन्भेस्टमेन्ट फण्ड १ को बजार मूल्य १० रुपैयाँ ६७ पैसा रहेको छ । त्यस्तै लक्ष्मी भ्याल्यू फण्डको बजार मूल्य १० रुपैयाँ ४० पैसा रहेको छ ।

तर ग्लोबल आइएमइ समुन्न्त स्किम १ को अवस्था खराब रहेको छ । सो योजनाको दोस्रो बजार मूल्य ८ रुपैयाँ ९५ पैसा रहेको छ । सिटिजन म्युचल फण्ड एकको अवस्था पनि उस्तै छ ।

दोस्रो बजारमा प्रतिइकाइ ९ रुपैयाँ ८९ पैसामा कारोवार भइरहेको छ । लक्ष्मी इक्विटी फण्ड ८ रुपैयाँ २४ पैसामा कारोवार भएको छ ।

नबिल इक्विटी फण्ड ८ रुपैयाँ ६१ पैसा, एनआइबिल प्रगति फण्ड ८ रुपैयाँ १५ पैसा, एनआइसि एशिया ग्रोथ फण्ड ९ रुपैयाँ ७५ पैसा, एनएमबी हाइब्रिड फण्ड १ को ९ रुपैयाँ ९१ पैसामा दोस्रो बजारमा कारोवार भएको छ ।

यस्तै, सानिमा इक्विटी फण्ड ९ रुपैयाँ ७० पैसा, सिद्दार्थ इक्विटी फण्डको प्रतिइकाइ ९ रुपैयाँ ७७ पैसामा कारोवार भएको छ ।