पाकिस्तानमा इमरान खानको पार्टी सबैभन्दा ठूलो, त्रिशंकु संसद बन्यो

इस्लामाबाद । पाकिस्तान चुनाव आयोगले आमनिर्वाचनको नतिजा आज सार्वजनिक गरेको छ । मतगणनाको परिणाम अनुसार पूर्व क्रिकेटर इमरान खानको पार्टी तेहरिक–ए–इन्साफले ११४ स्थान जितेको छ । यद्यपि, खानको पार्टीले सरकार गठनका लागि आवश्यक १३७ स्थान प्राप्त गर्न सकेन ।

बुधबार भएको निर्वाचनको मतगणनामा ढिलाई भएको भन्दै चौतर्फी आलोचना भइरहेको बेला निर्वाचन आयोगले अन्तिम परिणाम आज सार्वजनिक गरेको हो । प्राप्त विवरण अनुसार, प्रमुख तीन दल तेहरिक–ए–इन्साफले ११४, पूर्व प्रधानमन्त्री नवाज शरिफको पार्टी पाकिस्तान मुस्लिम लीगले ६३ र पाकिस्तान पिपुल्स पार्टीले ३९ स्थान जितेका छन् ।

कूल ३४२ स्थान रहेको पाकिस्तानी संसदमा २७२ स्थानका लागि प्रत्यक्ष निर्वाचन हुने गर्दछ । बाँकी सदस्यहरु महिला र अल्पसंख्यक समुदायहरुका लागि आरक्षित गरिएका छन् ।

सरकार गठनका लागि आवश्यक बहुमत (१३७ स्थान) प्राप्त नगरेका कारण इमरान खानले अन्य साना दलसँग गठबन्धन निर्माण गर्नुपर्ने परिस्थिति उत्पन्न भएको छ ।

खानको दलका प्रवक्ता फवाद चौधरीले गठबन्धन सरकार निर्माणका लागि साना दल र सहयोगी दलहरुसँग वार्ता सुरु भइसकेको बताए । तर, सरकार गठनका लागि केही दिन लाग्न सक्नेछ । पार्टी अध्यक्ष इमरान खानले आफ्नो पार्टी चुनावमा विजयी भएको घोषणा गरेका छन् ।

“पाकिस्तानी जनताका अघिल्तिर म प्रण गर्दछु कि पाकिस्तानको बागडोर मैले सम्हाले लगत्तै विगतमा भन्दा बिल्कुल भिन्न किसिमबाट म मुलुकलाई अघि लैजानेछु,” खानले भने । उनले मुलुकबाट भ्रष्टाचार निर्मूल गर्ने, कामै नलाग्ने अवस्थामा पुगेका सरकारी निकायको क्षमता सुदृढ गर्ने तथा सम्मान र समानताका आधारमा परराष्ट्र सम्बन्ध विकास गर्ने बताए ।

उनका विपक्षी र मानव अधिकार समूहहरुले चुनावमा व्यापक धाँधली भएको आरोप लगाएका छन् । उनीहरुले चुनावमा पाकिस्तानको शक्तिशाली सेना र गुप्तचर निकाय आइएसआईको संलग्नता रहेको दाबी गरेका छन् । खानले भने मुलुकको ७१ वर्षको इतिहासमा पहिलोपटक सबैभन्दा पारदर्शी चुनाव भएको बताए । रासस\एपी