मोहर लगानीबाट एक करोड नाफा



पाल्पा । पचास पैसा लगानीबाट स्थापना गरिएको रामपुर नगरपालिकास्थित अन्धकारमुक्ति बचत तथा ऋण सहकारी गत आवमा १ करोड ६० लाख रुपैयाँ नाफा गर्न सफल भएको छ ।

विस २०५५ मा २८ जना युवाले प्रतिव्यक्ति ५० पैसा दैनिक संकलन गरी स्थापना गरेको सो सहकारीको आव २०७३÷७४ सम्ममा सेयर पूँजी ४ करोड ५७ लाख ६० हजार रुपैयाँ छ ।

गत आवमा ३६ करोड ५४ लाख रुपैयाँ, बचत ४६ करोड ४५ लाख रुपैयाँ र अन्य कोष ४ करोड ५२ लाख ९१ हजार रुपैयाँ रहेको सहकारीका अध्यक्ष तीर्थप्रसाद पंगेनीले बताए ।

जिल्लाको रामपुर नगरपालिका, निस्दी, पूर्वखोला र रम्भा गाउँपालिकासम्म कार्यक्षेत्र विस्तार गरेपछि सहकारीको नौ हजार १५ जना सेयर सदस्य पुगेका छन् । ७ हजार ६ सय १६ महिला सदस्य रहेको व्यवस्थापक दीपेन्द्र पौडेलले बताए । ग्रामीण भेगमा बैंकको अभावमा बचत तथा ऋण कारोबार गर्न स्थानीय बासिन्दाले सहकारीमार्फत सजिलो मान्छन् ।

सहकारीद्वारा सुत्केरी खर्च प्रदान

पहिलो र दोस्रो बच्चा जन्माउने महिलालाई सुत्केरी स्याहार खर्चबापत पोषिलो आहाराका लागि प्रतिसुत्केरी १ हजार रुपैयाँ प्रदान गर्दै आएको छ । सुत्केरी भएपछि महिला कमजोर हुने भएकाले पोषण आहाराका लागि भत्ता बाँड्न थालेको व्यवस्थापक दीपेन्द्रप्रसाद पौडेलले बताए । गत आवमा सहकारीले सुत्केरी स्याहार खर्च ७० जनालाई प्रतिव्यक्ति १ हजारका दरले ७० हजार रुपैयाँ प्रदान गरिसकेको छ ।

ज्येष्ठ सदस्यलाई मासिक भत्ता

सहकारीले ज्येष्ठ नागरिक सामाजिक सुरक्षा भत्ता प्रदान गर्दै आएको छ । दुई वर्षअघिदेखि ७० वर्ष नाघेका ज्येष्ठ सदस्यलाई मासिक सुरक्षा भत्ता बाँड्दै आएको हो । गत आवमा ४४ जना ज्येष्ठ सदस्यलाई मासिक ५ सय रुपैयाँका दरले प्रदान गरिएको हो ।

किरिया खर्चसमेत सहकारीबाट

सहकारी सदस्यको श्रीमान् वा श्रीमतीको मृत्यु भएमा किरिया खर्च प्रदान गरिन्छ । सहकारीको नाफा रकम शेयर सदस्यलाई भन्दा वृद्धवृद्धा, सुत्केरी महिला र किरिया खर्चमा सहयोग गर्न थालेपछि सहकारीप्रति थप आकर्षण बढेको हो ।

सदस्यको मृत्युमा १ हजारदेखि २ हजार रुपैयाँसम्म १४ जनालाई गरी २२ हजार रुपैयाँ र सदस्यको श्रीमान् वा श्रीमतीको मृत्यु भएकामा ४ हजार रुपैयाँका दरले २८ जनालाई सहयोग प्रदान गरिएको अध्यक्ष पंगेनीले बताए । आर्थिक कारोबारसँगै सहकारीले सामाजिक काम गर्न थालेपछि यस जिल्लाको नमूना बन्दै गएको छ ।

सहकारीले पाल्पाका ग्रामीण क्षेत्रमा आर्थिक कारोबारका साथै स्वास्थ्य शिविर, बालमैत्री, महिला लक्षित, विद्यालयस्तरीय सचेतना कार्यक्रम, मोबाइल रिचार्ज सेवा, विप्रेषणलगायतका काम समेत गर्न थालेपछि यस भेगका स्थानीयवासी सहकारीतर्फ आकर्षित बन्दै गएका छन् । रासस


क्लिकमाण्डू