सरकारले पठाएका कर्मचारीलाई चिरिबाबुले कामको जिम्मेवारी दिएनन्

ललितपुर । ललितपुर महानगरपालिकामा विभिन्न विषयगत कार्यालयबाट आएका कर्मचारी जिम्मेवारीविहीन भएका छन् ।

विषयगत कार्यालयबाट १३ जना कर्मचारी महानगरपालिकामा हाजिर हुन आएका छन् ।

उनीहरुको दरबन्दी सम्बन्धित कार्यालयमा नै रहेकाले व्यवस्थापन गर्न नसकिएको महानगरपालिकाका प्रवक्ता राजु महर्जनले बताए ।

महानगरपालिमा जिल्ला शिक्षा कार्यालय, कृषि विकास कार्यालयलगायतका कार्यालयबाट कर्मचारी काजमा आएका छन् ।

उनीहरुलाई सामान्य व्यवस्था गर्न समेत महानगरपालिकाले सकेको छैन । ‘छुट्टै कोठा, टेबुल लगायतको व्यवस्था गर्न कठीनाई छ,’ उनले भने ।

सरकारले कर्मचारी समायोजनसम्बन्धी निर्देशिका बनाएपछि महानगरपालिकाले दरबन्दीको निर्णय गर्नेछ ।

‘हामीलाई त्यसका आधारमा व्यवस्थापन गर्न सजिलो हुने थियो,’ उनले भने ।

प्रमुख जिल्ला अधिकारीको अध्यक्षतामा जिल्लामा कर्मचारी समायोजन सम्बन्धी समिति छ । समितिको निर्णयका आधारमा धेरै कर्मचारी महानगरपालिका आउन इच्छा देखाएका छन् ।