अमेरिका पुगेर परराष्ट्रमन्त्री महतले भने- देशलाई तपाईँहरुको पुँजी र सीपको खाँचो छ



वासिङ्टन डिसी । परराष्ट्रमन्त्री डा. प्रकाशशरण महतले संयुक्त राज्य अमेरिकामा रहेका गैरआवासीय नेपाली समुदायलाई नेपालमा लगानी भित्र्याउन र यहाँ सिकेको ज्ञान र सीपलाई नेपालको विकासमा के कसरी प्रयोग गर्न सकिन्छ भनेर गम्भीर रूपमा सोच्न आग्रह गरेका छन् ।

गैरआवासीय नेपाली सङ्घ अमेरिकाको पाँचौँ साधारणसभालाई अमेरिकाको टेक्सास, डालासमा सम्बोधन गर्दै मन्त्री महतले नेपाल नयाँ संविधानको कार्यान्वयनमार्फत अब आर्थिक विकासको एजेन्डामा अघि बढ्न लागेकाले यो अभियानलाई सघाई समृद्ध नेपाल निर्माण गर्न विश्वका कुना काप्चामा रहेका नेपालीको भूमिका अहम् हुने धारणा राखे ।

विगतमा द्वन्द्वलगायतका विभिन्न कारणले आर्थिक विकासका क्षेत्रमा पछि परेको नेपाललाई अब आर्थिक रूपमा अघि बढाउन सबै नेपाली एकसाथ र एकजुट भएर लाग्नुपर्नेमा जोड उनको जोड छ ।

‘यो अभियानमा गैरआवासीय नेपालीको साथ र सहयोग महत्वपूर्ण छ,’ महतले भने ।

नेपालमा विगतमा जस्तै लगानीको वातावरण छैन भन्ने गरिएको तर त्यसमा सत्यता नरहेको उनले जानकारी दिए । नेपालमा अब विदेशीहरू पनि लगानीका लागि आइरहेको र गैरआवासीय नेपाली पनि विकास अभियानमा आउनुपर्ने महतको भनाई छ ।

‘नेपालको परराष्ट्र नीति कतै ढल्किएको छैन, नेपालतर्फमात्र ढल्किएको छ,’ उनले भने ।

बैठकमा अमेरिकाका लागि नेपाली राजदूत डा अर्जुन कार्की, गैरआवासीय नेपाली सङ्घ अमेरिकाका अध्यक्ष डा केशव पौडेलले उक्त सङ्घका क्रियाकलापबारे चर्चा गरेका थिए ।

साधारणसभामा अमेरिकाका विभिन्न १७ वटा च्याप्टर तथा उत्तर अमेरिका, क्यानाडालगायतबाट करिब ५०० जना एनआरएनएका सदस्यको सहभागिता रहेको छ ।

संयुक्त राज्य अमेरिका एनआरएनएको सबैभन्दा बढी सदस्य रहेको देश हो । यहाँ १० हजारभन्दा बढी सदस्य रहेका छन् । हाल अमेरिकामा कम्तीमा पनि तीन लाख नेपाली रहेका छन् ।

एक अनौपचारिक तथ्याङ्कअनुसार हाल अमेरिकामा नेपाली समुदायले मात्र कम्तीमा एक खर्ब आर्थिक लगानी गरेका छन् । टेक्सास राज्यमा मात्र एक हजारभन्दा बढी नेपालीको व्यवसाय रहेको छ ।

अमेरिकामा रहेका नेपालीले यहाँ ग्यास स्टेसन, सूचना प्रविधि, स्टोर, ब्युटिपार्लरलगायतका क्षेत्रमा लगानी गरेका छन् । रासस


पुष्प दुलाल