अमेरिका र इरानबीचको युद्धमा देखिएको विश्रामले विश्व बजारमा कच्चा तेलको मूल्य घट्यो

एजेन्सी । अमेरिका र इरानबीचको लडाइँमा देखिएको विश्रामले निरन्तरता पाएसँगै मंगलबार कच्चा तेलको मूल्यमा थप गिरावट आएको छ ।

यसले ऊर्जा आपूर्तिलाई अस्तव्यस्त पारेको मध्यपूर्वको द्वन्द्व अब मत्थर हुने आशा जगाएको छ । सेप्टेम्बरमा आपूर्ति हुने अन्तर्राष्ट्रिय बेन्चमार्क ब्रेन्ट क्रुडको मूल्य १.७५ प्रतिशतले घटेर प्रति ब्यारल ८६.८१ डलर कायम भएको छ । त्यसैगरी, अमेरिकी वेस्ट टेक्सस इन्टरमिडिएटको मूल्य पनि १.५६ प्रतिशतले ओरालो लाग्दै प्रति ब्यारल ८१.३० डलरमा झरेको छ ।

तेहरानले अमेरिकासँग १० दिने युद्धविराम गर्ने सहमति भएको भन्ने समाचारहरूलाई अस्वीकार गरे पनि हालका लागि दुई पक्षबीचको शत्रुतापूर्ण गतिविधिमा अस्थायी विश्राम देखिएको छ । यो स्थिति अमेरिकाको हतियार तथा गोलाबारुदको भण्डारमा कमी आएको रिपोर्टहरू सार्वजनिक भएपछि सिर्जना भएको हो ।

राष्ट्रपति डोनल्ड ट्रम्पले इरानमाथि भीषण आक्रमण गर्ने योजना बनाएको भए पनि हतियार अभावको चिन्ताका कारण ती योजनालाई तत्कालका लागि थाती राखेको न्युयोर्क टाइम्सले उल्लेख गरेको छ । यद्यपि, ट्रम्पले आफूसँग हतियारको अभाव भएको कुरालाई अस्वीकार गर्दै अमेरिकी सेनासँग पर्याप्त मात्रामा सैन्य सामग्री रहेको दाबी गरेका छन् ।

कमनवेल्थ बैंक अफ अस्ट्रेलियाले तेलको मूल्यमा आएको हालैको गिरावटले अमेरिका र इरानबीच तत्कालै तनाव बढ्ने चिन्ता कम भएको संकेत गरे पनि विश्वव्यापी ऊर्जा आपूर्तिमा अझै उच्च जोखिम रहेको चेतावनी दिएको छ ।

बैंकका अनुसार, दुई देशबीचको शत्रुतामा देखिएको यो विश्रामले ऊर्जा पूर्वाधारमा हुन सक्ने ठूला आक्रमणको सम्भावनालाई केही हदसम्म कम गरे पनि महत्त्वपूर्ण व्यापारिक मार्ग हर्मुज जलयोजकलाई लिएर हुने विवादले कुनै पनि बेला पुनः युद्ध निम्त्याउन सक्छ ।

गोल्डम्यान स्याक्सका विश्लेषकहरूले वर्षको अन्तिम तीन महिनासम्ममा हर्मुज जलयोजक पूर्ण रूपमा सञ्चालनमा आएमा ब्रेन्ट क्रुडको मूल्य प्रति ब्यारल ८० डलरसम्म झर्न सक्ने प्रक्षेपण गरेका छन् । तर, लाल सागरमा जारी अवरोध र साउदी अरबको तेल पूर्वाधारमा हुन सक्ने सम्भावित आक्रमणहरूले कच्चा तेल र प्रशोधित इन्धनको मूल्यलाई पुनः माथि पुर्याउन सक्ने जोखिम पनि उत्तिकै रहेको उनीहरूको विश्लेषण छ ।