एजेन्सी । मंगलबार अमेरिकी ट्रेजरी प्रतिफलमा समग्रमा केही गिरावट देखिएको छ ।
पश्चिम एसियामा बढ्दो तनाव र चलिरहेको द्वन्द्व रोक्न भइरहेका मध्यस्थताका प्रयासहरूलाई लगानीकर्ताहरूले नजिकबाट नियालिरहँदा यस्तो स्थिति देखिएको हो । अमेरिकी सरकारी ऋणको मुख्य मापदण्ड मानिने १० वर्षे ट्रेजरी नोटको प्रतिफल करिब ४.५९४ प्रतिशतमा स्थिर रह्यो ।
अर्कोतर्फ, संघीय रिजर्भको अल्पकालीन ब्याजदर नीतिलाई पछ्याउने २ वर्षे ट्रेजरी नोटको प्रतिफल भने १ बेसिस प्वाइन्ट भन्दा बढीले बढेर ४.१९८ प्रतिशत पुगेको छ । त्यस्तै, लामो अवधिको ३० वर्षे ट्रेजरी बोन्डको प्रतिफल ५.११८ प्रतिशतको आसपासमा यथावत रह्यो ।
बीएमओ क्यापिटल मार्केट्सका अनुसार, पश्चिम एसियामा पछिल्लो समय तनाव चर्किए पनि ट्रेजरी बजार तुलनात्मक रूपमा स्थिर देखिएको छ । मध्यस्थकर्ताहरूले युद्धविरामका लागि नयाँ प्रस्तावहरू अघि सारेको खबरले मंगलबार तेलको मूल्यलाई नियन्त्रणमा राख्न सहयोग पुर्याएपछि बजारमा ठूलो हलचल नआएको हो ।
तर, यस हप्ता अमेरिकाको कुनै ठूलो आर्थिक तथ्यांक सार्वजनिक नहुने भएकाले सरकारी बोन्डको मूल्य इन्धनको मूल्यमा हुने आकस्मिक परिवर्तन र इरानसँगको द्वन्द्वका घटनाक्रमहरूबाट प्रभावित हुन सक्ने जोखिम भने कायमै रहेको रणनीतिकारहरूले चेतावनी दिएका छन् ।
बीएमओका रणनीतिकारहरूका अनुसार, बजारको ध्यान अहिले ऊर्जा क्षेत्र र भूराजनीतिक तनावमा केन्द्रित भएकाले प्रतिफलमा हुने गिरावटको मात्रा सीमित हुन सक्छ । लगानीकर्ताहरूले ऊर्जाका कारण बढेको मुद्रास्फीतिको चाप कम हुन थालेको निष्कर्ष निकाल्नका लागि जुलाई र अगस्टको मुद्रास्फीति प्रतिवेदनहरू कुर्नुपर्ने देखिन्छ ।
यी प्रतिवेदनहरू नआएसम्म बजारमा पूर्ण विश्वासको वातावरण बन्न कठिन हुने देखिन्छ ।
उता बेलायतमा नयाँ प्रधानमन्त्री एन्डी बर्नह्यामले सरकारी वित्तीय नियमहरूमा लचकता अपनाउने संकेत दिएपछि सोमबार १० वर्षे गिल्ट प्रतिफल ८ बेसिस प्वाइन्टले बढेको थियो । तर, आज बिहान बेलायती बोन्डको प्रतिफल केही घटेर स्थिरतातर्फ मोडिएको देखिएको छ ।
अब लगानीकर्ताहरूको ध्यान शुक्रबार सार्वजनिक हुने एस एन्ड पी ग्लोबल फ्ल्यास यूएस पीएमआई प्रतिवेदनमा केन्द्रित हुनेछ । यस प्रतिवेदनले अमेरिकी उत्पादन र सेवा क्षेत्रको वास्तविक आर्थिक अवस्थाको चित्रण गर्ने भएकाले यसले आगामी दिनमा बजारको दिशा तय गर्न महत्त्वपूर्ण भूमिका खेल्ने अपेक्षा गरिएको छ ।
प्रतिक्रिया