‘यो देवताको शासन हो, यहाँ बोल्न पाइँदैन’: हर्क साम्पाङ

काठमाडौं । श्रम संस्कृतिक पार्टीका अध्यक्ष तथा सांसद हर्क साम्पाङले काठमाडौं महानगरको नेतृत्वमाथि गम्भीर प्रश्न उठाएका छन्।

सामाजिक सञ्जालमार्फत आफ्नो धारणा राख्दै साम्पाङले वर्तमान शासन पद्धतिलाई व्यङ्ग्यात्मक रूपमा ‘देवताको शासन’ भन्दै यहाँ निमुखा नागरिकको आवाज दबाइने गरेको टिप्पणी गरेका छन्।

काठमाडौंको त्रिपुरेश्वरमा आत्मदाह गरेका मुगुका युवा गणेश नेपालीको मृत्युको बिषयमा उनले यस्तो टिप्पणी गरेका हुन् ।

सामाजिक सञ्जालमार्फत मृतक नेपालीलाई सम्बोधन गर्दै सांसद साम्पाङले लेखेका छन् ‘देवताको शासन हो यो ! यहाँ बोल्न पाइँदैन ! यहाँ देवतालाई दोष्दा पाप लाग्छ, पाप !, तिम्रै गल्तीले जरिवाना तिर्न नसकेको कारण तिमीलाई कमजोर भन्नेहरू उनैका भक्त हुन्।’

उनले देशमा पात्र फेरिए पनि गरिबका दुःख र शासकको प्रवृत्ति नफेरिएको दाबी गरे।

नेपालमा पात्र फेरिए पनि प्रवृत्ति र शासन उस्तै रहेको उनको निष्कर्ष छ। पसिना गन्हाउने गरिब नागरिकले युरोप-अमेरिकाको ‘अत्तर’ गन्हाउनेहरूलाई भोट दिउन्जेलसम्म देशमा परिवर्तन नआउने उनको जिकिर छ।

‘गरिबले गरिबको हित गर्ने, गरिबको पक्षमा नीति बनाउने पार्टीलाई नचिन्नु पनि यो दुर्भाग्यको अर्को अहम कारण हो’, साम्पाङले भनेका छन्।

धेरैका लागि यो घटना एउटा समाचार मात्रै भए पनि आफ्ना लागि गणेश नेपाली एउटा बिम्ब, इतिहास, विद्रोह र अमर सन्देश भएको सांसद साम्पाङले उल्लेख गरेका छन्।

मृतकका बाबुआमा र आफन्तजनलाई लागेको गहिरो चोट आफूले महसुस गर्न सक्ने भन्दै उनले गरिब र निमुखाको न्यायको पक्षमा निरन्तर लड्ने प्रतिबद्धता जनाए।

‘कोही तिम्रो न्यायको पक्षमा उभियोस् नउभियोस्, तर म सधैँ तिम्रो पक्षमा कराउनेछु, आवाज उठाउनेछु’, उनले अगाडि लेखेका छन्, ‘तिमी जस्ता लाखौं युवालाई यही देशमा रोजगारी दिनुपर्छ भन्ने माग लिएर एक्लै भए पनि सडक, सञ्जाल र सदनमा बरबराइरहनेछु।’

जतिसुकै गाली खाए पनि आफू पछि नहट्ने बताउँदै सांसद साम्पाङले आगो पिएर बाँच्ने विवश कथा आफूसँग रहेको उल्लेख गरे।