काठमाडौं । एप्पलले सन् २०२६ मा सार्वजनिक गर्ने तयारी गरिरहेको ‘आइफोन १८ प्रो’ कस्तो होला भन्ने चासो बढेको छ ।
हालै सार्वजनिक भएका रिपोर्टहरूका अनुसार, एप्पलले यो मोडेलमा आफ्ना पुराना रणनीतिहरू बदल्दै केही ऐतिहासिक परिवर्तनहरू गर्ने देखिएको छ ।
विशेष गरी क्यामेरा प्रविधि, प्रोसेसर र र्यामको क्षमतामा हुने यो अपग्रेडले स्मार्टफोनको कार्यक्षमतालाई नयाँ उचाइमा पुऱ्याउने अपेक्षा गरिएको छ ।
आइफोन १८ प्रोको सबैभन्दा ठूलो र अचम्मको परिवर्तन यसको क्यामेरा सेन्सरमा हुनेछ । रिपोर्टका अनुसार, आइफोन १८ प्रोमा सामसुङको नयाँ ४८-मेगापिक्सेलको अल्ट्रा-वाइड सेन्सर प्रयोग गरिनेछ। यसका साथै, एप्पलले यस फोनमा पहिलो पटक ‘भ्यारिएबल एपर्चर’ लेन्स प्रविधि भित्र्याउँदैछ ।
यस प्रविधिले प्रयोगकर्तालाई प्रकाशको अवस्था अनुसार लेन्सको मुखलाई म्यानुअल वा अटोमेटिक रूपमा घटाउन वा बढाउन अनुमति दिनेछ, जसले गर्दा कम उज्यालोमा पनि व्यावसायिक क्यामेराले जस्तै उत्कृष्ट तस्बिरहरू खिच्न सकिनेछ ।
कार्यक्षमताको सन्दर्भमा, आइफोन १८ प्रोमा एप्पलले पहिलो पटक १२ जीबी र्याम उपलब्ध गराउने सम्भावना छ। यो वृद्धि मुख्यतया ‘एप्पल इन्टेलिजेन्स’ अर्थात् फोनभित्रै रहने आर्टिफिसियल इन्टेलिजेन्सलाई अझ शक्तिशाली र तीव्र बनाउनका लागि गरिएको हो ।
यस फोनमा विश्वकै सबैभन्दा उन्नत चिप निर्माण प्रक्रिया २ न्यानोमिटरमा आधारित ‘ए२०’ बायोनिक चिपसेट जडान गरिनेछ । यो नयाँ चिपले फोनको गतिलाई अद्भुत बनाउनुका साथै ऊर्जा खपतमा भारी कटौती गर्नेछ, जसले गर्दा ब्याट्री लाइफमा ठूलो सुधार आउनेछ ।
डिजाइन र भित्री बनावटमा पनि एप्पलले नयाँ प्रयोग गर्दैछ। फोनभित्रका पार्टपुर्जाहरूलाई अझ व्यवस्थित गर्न ‘कम्प्याक्ट क्यामेरा मोड्युल’को प्रयोग गरिनेछ, जसले फोनको आन्तरिक स्पेस बचाउन मद्दत गर्नेछ ।
यसका साथै, फोनमा ‘अन्डर-डिस्प्ले फेस आइडी’ प्रविधि देख्न सकिने सम्भावना छ, जसले गर्दा स्क्रिनमा रहेको ‘डायनामिक आइल्याण्ड’ को आकार अझै सानो हुने वा पूर्ण रूपमा हटेर प्रयोगकर्तालाई ‘फुल स्क्रिन’ को अनुभव मिल्नेछ ।
सन् २०२६ को सेप्टेम्बर महिनातिर सार्वजनिक हुनेसक्ने बताइएको छ । नयाँ क्यामेरा सेन्सर, शक्तिशाली ए२० चिप, र उच्च क्षमताको र्यामका कारण आइफोन १८ प्रो केवल एउटा स्मार्टफोन मात्र नभई एउटा शक्तिशाली ‘एआई डिभाइस’ को रूपमा स्थापित हुने बताइएको छ ।
प्रतिक्रिया