एजेन्सी । अमेरिकाका राष्ट्रपति डोनल्ड ट्रम्पले वाशिङटन र तेहरानबीचको ६० दिने युद्धविराम अवधिमा हर्मुज जलयोजक पार गर्ने जहाजहरूलाई कुनै पनि महसुल नलिइने बताएका छन् । साथै, उनले बृहत्तर शान्ति सम्झौता सफल हुन सकेन भने भविष्यमा अमेरिकाले शुल्क लगाउन सक्ने सम्भावनालाई भने खुला राखेका छन् ।
ट्रुथ सोसलमा गरिएको एक पोस्टमा अमेरिकाले अन्यथा निर्णय नगरेसम्म यो रणनीतिक जलमार्ग महसुलमुक्त रहनेछ भनी ट्रम्पले जानकारी दिएका छन् ।
‘युद्धविरामको ६० दिने अवधिमा हर्मुज जलयोजकमा कुनै महसुल लाग्ने छैन र ६० दिनको अवधि सकिएपछि पनि कुनै महसुल लाग्ने छैन । सम्झौता पूरा नभएको खण्डमा विगत, वर्तमान र भविष्यको खर्च फिर्ताको उद्देश्यका लागि गार्डियन एन्जलको रूपमा मध्यपूर्वका देशहरूलाई प्रदान गरिएको सेवा बापत अमेरिकाले शुल्क लगाउन सक्नेछ,’ ट्रम्पले लेखेका छन् ।
लेबनन युद्धविरामलाई इजरायलले उल्लंघन गरेको प्रतिक्रियास्वरूप इरानले हर्मुज जलयोजक बन्द गरेको छ ।
वाशिङटन र तेहरानबीच वार्ता सहज बनाउन ६० दिने युद्धविरामको सहमति भए तापनि इरानको इस्लामिक रिभोलुसनरी गार्ड कर्प्स (आईआरजीसी) ले शनिबार हर्मुज जलयोजक बन्द भएको घोषणा गर्यो । यो कदम ट्रम्प र इरानी राष्ट्रपति मसुद पेजेस्कियानबीच भएको अन्तरिम सम्झौताको केही दिनपछि तनाव बढाउने गरी आएको छ ।
आईआरजीसीले लेबननमा इजरायली कारबाही र अमेरिकाले युद्धविराम प्रतिबद्धता पालना गर्न नसकेको भन्दै जहाजहरूलाई उक्त जलमार्गबाट टाढा रहन चेतावनी दिएको छ । उसले जलयोजकमा प्रवेश गर्ने जहाजहरू आफ्नै जोखिममा रहने बताएको छ ।
यस घोषणाले तेल र ग्यास निर्यातको मुख्य मार्गका रूपमा रहेको जलयोजकको भूमिकाका कारण विश्वव्यापी ऊर्जा आपूर्तिमा चिन्ता पुनः बढाएको छ ।
अमेरिकी सेनाको सेन्ट्रल कमान्डले शनिबार ५५ वटा व्यापारिक जहाजहरूले १ करोड ७० लाख ब्यारलभन्दा बढी तेल र अन्य सामान बोकेर उक्त बाटो पार गरेको बताएको छ र व्यापारिक ढुवानीको निरन्तर प्रवाह सुनिश्चित गर्ने प्रतिबद्धता जनाएको छ ।
इरानका सर्वोच्च नेता आयातोल्लाह मोज्तबा खामेनेईका सल्लाहकार मोहम्मद मोख्बरले वाशिङटनलाई १४ बुँदे अन्तरिम सम्झौताको पहिलो बुँदा कार्यान्वयन गर्न असफल भएको आरोप लगाएका छन् । त्यसमा लेबनन लगायत सबै मोर्चाहरूमा युद्धविराम आवश्यक थियो ।
सामाजिक सञ्जाल एक्समा लेख्दै मोख्बरले सम्झौता व्यवहारमा कार्यान्वयन नभएसम्म मध्यपूर्वको ऊर्जा आपूर्ति ठप्प रहने चेतावनी दिए । उनको यो भनाइ इजरायली सेना र हिजबुल्लाहबीच पुनः झडप भइरहेको समयमा आएको हो । त्यसले लेबनन युद्धविराम टिक्ने विषयमा नयाँ शंका उत्पन्न गरेको छ ।
प्रतिक्रिया