यो व्यक्तिगत रूपमा मेरा लागि वास्तवमै एक भावुक क्षण हो । आतिथ्य सत्कारको क्षेत्रमा हाम्रो यात्रा करिब २८ वर्ष पुगेको छ । सन् १९९८ मा हामी नेपालमा एउटा होटल सुरु गर्न चाहन्थ्यौं । दुर्भाग्यवश, केही प्राविधिक कारणहरूले गर्दा ‘ताज’ समूहले हामीसँग अर्को सम्झौता गर्न सकेन । उनीहरूको यहाँ पहिले नै एउटा होटल ‘अन्नपूर्ण’ थियो । त्यस समयमा त्यो कानुनी विवादमा थियो ।
त्यसको साटो उनीहरूले हामीलाई श्रीलंका जान आग्रह गरे । त्यो देश त्यसबेला गृहयुद्धको चपेटामा थियो । त्यही वर्ष ६ वटा विमानहरूमा बम विस्फोट गरिएको थियो । ताजको अन्तर्राष्ट्रिय विभाग हेर्ने मेरा साथी राजीव गुजराललाई भनेको याद छ, ‘तपाईं मेरो साथी हो कि शत्रु ? तपाईंले मलाई यस्तो समयमा कोलम्बो ल्याउनुभएको छ जब स्वयं श्रीलंकालीहरू समेत यहाँ लगानी गर्न चाहँदैनन् ।’
तैपनि, ताजसँगको हाम्रो साझेदारीले ठूलो सिकाइ र अनुभव प्रदान गर्यो । सौभाग्यवश, डेभिड र राजीवको सहयोगले दुई वर्षअघि मलाई सिंगापुरको एफ–वानमा आमन्त्रित गरियो । त्यहीँ मैले मेरा साथी राजीव मेननमा रहेको जोश, दृढ विश्वास र कठिन निर्णयहरू लिन सक्ने क्षमता देखें । ती गुणहरूले म्यारियटसँग पहिलेदेखि भइरहेको छलफललाई पुनर्जीवित गर्न मद्दत गर्यो र हामीलाई एउटा सफल साझेदारी निर्माण गर्न सक्षम बनायो ।
यो सजिलो थिएन । यात्रा चुनौतीपूर्ण थियो तर हामीले यसलाई सम्भव बनायौं र म साँच्चै हर्षित छु । श्री म्यारियट, म भन्न चाहन्छु– राजीव मेनन जस्ता क्षमतावान मानिसहरू नै म्यारियट इन्टरनेशनललाई विश्वकै सबैभन्दा ठूलो हस्पिटालिटी कम्पनी बनाउने आधार हुन् । म उहाँका लागि जोडदार ताली बजाउन चाहन्छु ।
साझेदारी निर्माणको कुरा आउँदा उनीहरूले ठूलो उत्साह र जोश देखाउँछन् । म्यारियट इन्टरनेशनलले आफ्ना साझेदारहरूलाई दिने सम्मान उल्लेखनीय छ । यो सायद हामीले हाम्रा साझेदारहरूलाई दिने सम्मान जत्तिकै छ किनकि यहाँ आज उपस्थित साझेदारहरू बिना हामी केही हुने थिएनौं । मेरो विचारमा, यो आपसी सम्मानको संस्कृति नै म्यारियटलाई म्यारियट बनाउने प्रमुख विशेषताहरू मध्ये एक हो ।
पक्कै पनि, म्यारियटको सफलता विश्वका केही उत्कृष्ट र प्रशंसित हस्पिटालिटी ब्रान्डहरू व्यवस्थापन गर्ने क्षमतामा आधारित छ । करिब ९ हजार ९०० होटल, १७ लाख कोठा र १४६ देशमा उपस्थिति हुनु कुनै सानो उपलब्धि होइन । तर, हामीले आज यहाँ जे गरिरहेका छौं त्यो उत्तिकै महत्त्वपूर्ण छ ।
यो अवसर म्यारियट इन्टरनेशनलका लागि मात्र नभई हाम्रो लागि, हाम्रा साझेदारहरूका लागि र सबैभन्दा महत्त्वपूर्ण कुरा, नेपालका लागि विशेष छ । हामी आतिथ्य सत्कारलाई नयाँ उचाइमा लैजान तयार छौं भनी आज नेपालले विश्वलाई सन्देश दिइरहेको छ । मानिसहरूले नेपालमा ‘द रिट्ज–कार्लटन’ र ‘वेस्टिन’ आउँदैछन् भनेर पढ्नेछन् (र मलाई थाहा छ, पछि जे डब्लु म्यारियट लगायतका अन्य सम्झौताहरू पनि हुनेछन्), यसले एउटा शक्तिशाली सन्देश दिनेछ । स्थानीय कला, शिल्प र सामुदायिक संलग्नता प्रवर्धन गर्ने म्यारियटको प्रतिबद्धतासँगै यो साझेदारीको प्रभाव निकै दूरगामी हुनेछ ।
तपाईंको विश्वास र भरोसाका लागि धन्यवाद । यस महत्त्वपूर्ण घडीमा हामी, हाम्रा साझेदारहरू र सबैभन्दा माथि नेपालको साथमा उभिनुभएकोमा धन्यवाद ।
तपाईंलाई थाहा छ, भदौ २४ को घटनापछि नेपालले नयाँ यात्रा सुरु गरेको छ । हामीसँग जम्मा ३५ वर्ष पुगेका युवा प्रधानमन्त्री हुनुहुन्छ । उहाँ देशको भविष्यप्रति अत्यन्तै उत्साहित हुनुहुन्छ । उहाँको प्रशासनले नेपालको समृद्धिका लागि नयाँ मार्गचित्र तयार गरेको छ ।
हामीसँग करिब ४० वर्षको औसत उमेर भएका सांसदहरू छन् । संसद्का सदस्यहरू शिक्षित र विश्व परिवेशबारे जानकार छन् । यो समय उद्योग क्षेत्रले नेपालको साथमा उभिएर यस सरकारको भिजनलाई सहयोग गर्ने बेला हो ।
नयाँ सरकारले शपथ लिएकै दिन हामीले ‘द रिट्ज–कार्लटन’ को शिलान्यास समारोह आयोजना गरेकोमा हामी ठूलो गर्व गर्छौं । र दुई महिनाभन्दा कम समयमा डेभिड म्यारियट जस्तो प्रतिष्ठित र विश्वव्यापी रूपमा सम्मानित व्यक्तित्वलाई यस कोशेढुंगाको साक्षी बन्न नेपालमा स्वागत गर्न पाउँदा हामी हर्षित छौं ।
राहुलले उल्लेख गरेको कुरामा म केही थप्न चाहन्छु । विगत दुई वर्षमा हामीले नेपालभर फैलिने गरी साझेदारीलाई निकै सावधानीपूर्वक विकास गरेका छौं । वास्तवमा, म्यारियटका धेरै कम ब्रान्डहरू मात्र यहाँ आउन बाँकी होलान् । नेपाल सायद ती थोरै देशहरूमध्ये एक हुन सक्छ जहाँ म्यारियटले आफ्ना लगभग सबै ब्रान्डहरू प्रदर्शन गरेको छ ।
मलाई विश्वास छ– म्यारियट इन्टरनेसनलको विश्व मानचित्रमा नेपालले एउटा प्रमुख स्थान पाउनुपर्छ । हिमालयको काखमा रहेको यो सानो राष्ट्र पहिले अधिराज्य थियो र अहिले गणतन्त्र भएको छ । यहाँ म्यारियटका यति धेरै ब्रान्डहरूको संग्रह छ ।
यो साझेदारी विशेष रूपमा अर्थपूर्ण छ किनकि हामी म्यारियटको स्थापनाको सयौं वार्षिकोत्सव मनाउन तपाईंहरूसँग जोडिएका छौं । म श्री जे. विलार्ड म्यारियटप्रति सम्मान प्रकट गर्न चाहन्छु । उहाँले सन् १९२७ मा म्यारियटको स्थापना गर्नुभयो । मैले उहाँलाई भेट्ने मौका कहिल्यै पाइनँ तर मैले विश्वभरका म्यारियट होटलहरूमा उहाँका तस्बिरहरू देखेको छु । उहाँले निर्माण गर्नुभएको भिजन, समर्पण र विरासतप्रति मेरो ठूलो सम्मान छ ।
म म्यारियटको निरन्तर सफलताको कामना गर्छु । हाम्रा सबै साझेदारहरूसँगै हाम्रो साझेदारीको निरन्तर वृद्धि र समृद्धिको कामना गर्छु । हामीले सधैं आफ्ना साझेदारहरूलाई साथमै लिएर हिँड्नुपर्छ । सँगै मिलेर हामी आगामी वर्षहरूमा अझ धेरै अवसरहरू सिर्जना गर्नेछौं र नयाँ बाटोहरू खोल्नेछौं भन्नेमा म विश्वस्त छु ।
हामीले यस साझेदारीलाई अझ उच्च तहमा लैजाने उपायहरू फेला पार्नेछौं भन्ने कुरामा म सुनिश्चित छु । नेपालमा मात्र नभई राहुल र वरुणको संलग्नता मार्फत भारतमा पनि यो साझेदारी चल्नेछ । ‘सिरिज बाई म्यारियट’ ब्रान्ड अन्तर्गत ५०० होटल खोल्नु कुनै सानो उपलब्धि होइन । उनीहरूले लगभग हप्तामा एउटा होटल खोलिरहेको तथ्य साँच्चै नै उल्लेखनीय छ ।
हामीले पनि भविष्यका लागि एउटा मार्गचित्र तयार गरेका छौं । नेपालले आफूलाई विश्वव्यापी वेलनेस गन्तव्यको रूपमा स्थापित गर्ने निर्णय गरेको छ । सन् २०२७ लाई वेलनेस उद्योगका लागि आवश्यक पूर्वाधार र इकोसिस्टम निर्माण गर्ने कोशेढुंगा वर्षको रूपमा परिकल्पना गरिएको छ ।
वेलनेस र कृषि क्षेत्रमा हाम्रो साझेदारी विस्तार गर्न यसभन्दा उपयुक्त समय के हुन सक्छ र ? साझेदारीहरू भर्खरै सुरु भएका छन् र अहिले म्यारियट इन्टरनेसनल परिवारको हिस्सा बनेका छन् ।
म तपाईंको धेरै समय लिन चाहन्नँ । हाम्रा सबै साझेदारहरूले हामीमाथि देखाउनुभएको विश्वासका लागि धन्यवाद दिँदै म आफ्नो कुरा टुंग्याउन चाहन्छु । म नेपाल सरकार, सबै सरोकारवालाहरू र पुनः एकपटक म्यारियट इन्टरनेशनलको टोलीलाई तपाईंको विश्वास र साझेदारीका लागि धन्यवाद दिन चाहन्छु ।
धन्यवाद । म तपाईंहरू सबैलाई शुभकामना व्यक्त गर्छु ।
चौधरी ग्रुप र सीजी हस्पिटालिटी ग्लोबलका अध्यक्ष विनोद चौधरीले २०८३ जेठ २४ गते नेपालमा रिट्ज–कार्लटन र वेस्टिन सञ्चालन गर्ने सम्झौता घोषणाको अवसरमा काठमाडौंमा गरेको सम्बोधनको सम्पादित अंश ।
प्रतिक्रिया