ट्रम्पको भ्रमणले द्विदेशीय सम्बन्धमा नयाँ मोड ल्याउने चिनियाँ जनताको अपेक्षा

एजेन्सी । शुक्रबार एरोबिक्स र पारिवारिक गतिविधिले गुन्जायमान बेइजिङको एउटा पार्कमा केही बासिन्दाहरूले अमेरिकाका राष्ट्रपति डोनल्ड ट्रम्पको चीन भ्रमणले विश्वका दुई शीर्ष अर्थतन्त्रहरूबीच वर्षौंदेखि रहेको तनावपछि एउटा नयाँ मोड ल्याउन सक्ने भन्दै आशा व्यक्त गरेका छन् ।

बासिन्दाहरूले रोयटर्स समाचार एजेन्सीलाई बताएअनुसार, यस शिखर सम्मेलनले अमेरिका–चीन मित्रतामा एक कदम अगाडिको यात्रालाई प्रतिनिधित्व गर्छ । ताइवान, प्रविधि र व्यापारमा रहेका गहिरा मतभेदका बावजुद उनीहरूको विचारले परिवर्तनको आशा झल्काउँछ ।

‘यो त्यस्तो दिन हो जुन हामी साधारण जनता देख्न चाहन्छौं,’ पार्कमा रहेकी ६४ वर्षीया सेवानिवृत्त सिन जिन्मेईले भनिन्, ‘जब देशहरू बीचको सम्बन्ध सुधारिन्छ, हाम्रो आफ्नो जीवन सहज हुन्छ र शासन बढी प्रभावकारी बन्छ । त्यसैले हामी ट्रम्पको भ्रमणलाई सकारात्मक विकासका रूपमा हेर्छौं । यसले दुई राष्ट्रबीचको मित्रतामा एक कदम अगाडि बढेको संकेत गर्छ ।’

‘हिजो मैले राष्ट्रपति ट्रम्प र राष्ट्रपति सी जिनपिङले सँगै टेम्पल अफ हेभन भ्रमण गरेको देखें । त्यसपछि ट्रम्पले चीन एक अद्भुत ठाउँ हो भने । मलाई विश्वास छ यसले चीन–अमेरिका सम्बन्धमा एउटा नयाँ मोड ल्याउनेछ र यो एउटा राम्रो सुरुवात हो,’ आर्थिक क्षेत्रमा काम गर्ने ३० वर्षीय हान जिंगीले भने ।

५३ वर्षीया याङ यान्क्सियाले विगत करिब एक दशकदेखि चीन र अमेरिकाबीच निरन्तर तनाव रहेको कुरा स्वीकार गरिन् र विश्वव्यापी स्थितिलाई चरम तनावपूर्ण भनी वर्णन गरिन् ।

तैपनि, खाद्य र पेय पदार्थ व्यवसायमा आबद्ध उनका लागि यो शिखर सम्मेलन तनाव कम हुने धेरै महत्त्वपूर्ण संकेत हो जुन दुवै देशका जनताका लागि विशेषगरी आर्थिक क्षेत्रमा धेरै लाभदायक हुनुपर्छ ।’

विशेषगरी चीनमा दुई प्रमुख शक्तिहरू यसरी भेटिनुले सम्पूर्ण अन्तर्राष्ट्रिय समुदायका लागि निकै सकारात्मक सन्देश दिन्छ ।