ट्रम्पसँग एनभिडियाका जेन्सेन ह्वाङ पनि चीन जाने

एजेन्सी । एनभिडियाका सीईओ जेन्सेन ह्वाङ अमेरिकाका राष्ट्रपति डोनल्ड ट्रम्पको चीन भ्रमणमा सहभागी भएका छन् जबकि सुरुमा उनलाई आमन्त्रण नगरिएको संकेतहरू देखिएका थिए ।

प्रतिनिधिमण्डलमा ह्वाङको अनुपस्थितिको बारेमा सञ्चारमाध्यममा आएका समाचारहरू देखेपछि ट्रम्पले एनभिडियाका सीईओलाई फोन गरेर सहभागी हुन आग्रह गरेको यस घटनाबारे जानकार एक स्रोतले सीएनबीसीलाई बताएको छ ।
ह्वाङ एयर फोर्स वानमा चढ्नका लागि अलास्का उडेको स्रोतले भन्यो ।

ट्रम्पले यस हप्ता बेइजिङमा एक दर्जनभन्दा बढी अमेरिकी कार्यकारीहरूलाई लैजाँदैछन् । त्यहाँ बिहीबार र शुक्रबार चीनका राष्ट्रपति सी चिनपिङसँग उनको भेट हुने कार्यक्रम छ ।

‘जेन्सेन अमेरिका र प्रशासनको लक्ष्यहरूलाई समर्थन गर्न राष्ट्रपति ट्रम्पको निमन्त्रणामा शिखर सम्मेलनमा सहभागी हुँदैछन्,’ चिप क्षेत्रको दिग्गज कम्पनीका प्रवक्ताले एक विज्ञप्तिमा भने । ह्वाङ भ्रमणको बीचमा अलास्काबाट सहभागी भएको बारे सोधिएको प्रश्नमा एनभिडियाले सोही टिप्पणीलाई दोहोर्यायो तर त्यसको कुनै कारण भने खुलाएन ।

ह्वाइट हाउसले यसबारे टिप्पणीका लागि गरिएको अनुरोधमा तुरुन्तै कुनै प्रतिक्रिया दिएन ।

एक सामाजिक सञ्जाल पोस्टमा ट्रम्पले ह्वाङ एयर फोर्स वानमा रहेको कुरा पुष्टि गरे र सीएनबीसी लगायतका सञ्चारमाध्यमहरूले रिपोर्ट गरे जस्तो उनलाई निमन्त्रणा नगरिएको कुरालाई अस्वीकार गरे । अमेरिकी व्यवसायहरूका लागि चीनलाई खुला गर्नु सीसँग उनको पहिलो अनुरोध हुने उनले थपे ।

‘मैले असाधारण विशेषता भएका नेता राष्ट्रपति सीलाई चीन खुला गर्न आग्रह गर्नेछु ताकि यी प्रतिभावान व्यक्तिहरूले आफ्नो जादु देखाउन सकून् र जनवादी गणतन्त्र चीनलाई अझ उच्च स्तरमा पुर्याउन मद्दत गर्न सकून् !’ अमेरिकी व्यापार प्रतिनिधिहरूको ठूलो टोलीलाई संकेत गर्दै ट्रम्पले भने ।

एनभिडियाका सबैभन्दा उन्नत चिपहरू, जुन एआई मोडलहरूलाई तालिम दिन व्यापक रूपमा प्रयोग गरिन्छ, विगत चार वर्षदेखि चीनमा बिक्रीका लागि कडा अमेरिकी प्रतिबन्धहरूको सामना गरिरहेका छन् । कम्पनीले फेब्रुअरीमा भनेअनुुसार, अमेरिकी सरकारले स्वीकृत गरेका चिपका संस्करणहरूलाई अझै पनि चीनमा अनुमति दिइएको छैन ।

चीनले आफ्नै चिपहरू बनाउने र एनभिडियामा निर्भर नहुने डीपसीक जस्ता एआई मोडलहरू निर्माण गर्ने प्रयास गरिरहेको छ । सत्तारूढ चिनियाँ कम्युनिस्ट पार्टीको आधिकारिक जर्नलमा यस महिनाको सुरुमा प्रकाशित एउटा लेखले अमेरिकी चिप प्रतिबन्धका कारण स्थानीय कम्पनीहरूले आफ्नो विकासको गति कम गर्नुपरेको उल्लेख गरेको थियो । साथै, विश्वव्यापी ग्राफिक्स प्रोसेसिङ युनिट बजारमा एनभिडियाको वर्चस्वलाई पनि जोड दिएको थियो ।

‘म अझै पनि विश्वास गर्छु, हामी निर्यात नियन्त्रणको सम्झौताबाट निकै टाढा छौं… तर उनी त्यहाँ हुनु र राष्ट्रपतिको प्रतिनिधिमण्डलको हिस्सा हुनु सकारात्मक कुरा हो र यो उनका लागि र राष्ट्रपतिका लागि पनि महत्त्वपूर्ण छ,’ पूर्व अमेरिकी वाणिज्य सचिव कार्लोस गुटिएरेजले स्कक बक्स एसियालाई भने ।