अमेरिकी सैन्य अड्डा र जहाजहरूमाथि आक्रमण गर्ने आईआरजीसीको चेतावनी

एजेन्सी । पर्सियाली खाडीमा तेहरान र वाशिङटनबीच बढ्दो तनावका बीच इरानको इस्लामिक रिभोल्युसनरी गार्ड कर्प्स (आईआरजीसी) ले हर्मुज जलयोजकमा इरानी तेल ट्यांकर वा व्यापारिक जहाजहरूमाथि हुने थप आक्रमणले यस क्षेत्रमा रहेका अमेरिकी सैन्य अखडा र जहाजहरूमाथि भारी आक्रमण निम्त्याउने चेतावनी दिएको छ ।

एक्समा पोस्ट गरिएको एक विज्ञप्तिमा आईआरजीसी नेभी कमान्डले भन्यो, ‘चेतावनी ! इरानका तेल ट्यांकर र व्यापारिक जहाजहरू विरुद्धको कुनै पनि आक्रामकताको परिणाम स्वरूप यस क्षेत्रका अमेरिकी केन्द्रहरूमध्ये एक र शत्रुको जहाजहरूमाथि भारी आक्रमण हुनेछ ।’

त्यसको केही समयपछि आईआरजीसी एरोस्पेस फोर्सले यस क्षेत्रमा रहेका अमेरिकी सैन्य सम्पत्ति र जलसेनाका जहाजहरूलाई इरानी मिसाइल र ड्रोनहरूले पहिले नै निशाना बनाइसकेको दाबी गर्यो ।

‘आईआरजीसी एरोस्पेस फोर्सका मिसाइल र ड्रोनहरूले यस क्षेत्रका अमेरिकी लक्ष्यहरू र शत्रु आक्रमणकारीका जहाजहरूलाई निशानामा पारिसकेका छन् । हामी फायर गर्ने आदेशको पर्खाइमा छौं,’ पोस्टमा लेखिएको थियो ।

यो चेतावनी अमेरिकाको सेन्ट्रल कमान्डले इरान विरुद्ध जारी नाकाबन्दी अपरेशनको एक हिस्साको रूपमा ओमानको खाडीमा दुईवटा इरानी झण्डावाहक तेल ट्यांकरहरूलाई अमेरिकी जलसेनाले निष्क्रिय पारेको बताएको एक दिनपछि आएको हो ।

सेन्टकमका अनुसार, सामान लोड नगरिएका ट्यांकरहरू एम/टी सी स्टार थर्ड र एम/टी सेभदालाई इरानी बन्दरगाहमा पुग्नबाट रोकिएको थियो जसमा यूएसएस जर्ज एच.डब्लु. बुशबाट उडेको अमेरिकी जलसेनाको एफ/ए१८ सुपर हर्नेटले ती जहाजका धुवाँ निकाल्ने चिम्नीहरूमा सटीक बम प्रहार गरेको थियो ।

अमेरिकी सेनाले अप्रिल १३ देखि चारवटा इरानी जहाजहरूलाई निष्क्रिय पारेको र नाकाबन्दीको अवधिमा ५८ वटा व्यापारिक जहाजहरूलाई अन्यत्र पठाएको सेन्टकमले भनेको छ ।

पछिल्लो घटनाक्रम यस हप्ताको सुरुमा विश्वव्यापी ऊर्जा पारवहनको मुख्य मार्ग हर्मुज जलयोजक नजिक अमेरिकी जलसेना र इरानी सेनाबीच भएको गोली हानाहानपछि आएको हो ।

जलयोजक पार गर्ने क्रममा अमेरिकी जलसेनाका तीनवटा विध्वंसक जहाजहरूमाथि आक्रमण भएको अमेरिकाका राष्ट्रपति डोनल्ड ट्रम्पले बिहीबार पुष्टि गरे । तर, ती जहाजहरू सफलतापूर्वक पार भएको उनले बताए ।

ट्रुथ सोसलमा एक पोस्ट गर्दै ट्रम्पले इरानी सेनाले गोली चलाए पनि विध्वंसक जहाजहरूले अत्यन्तै सफलतापूर्वक पार गरेको जानकारी दिए । उनले भिडन्तमा संलग्न इरानी जलसेनाका डुंगाहरू पूर्ण रूपमा नष्ट भएको दाबी गरे र अमेरिकी जहाजहरूलाई निशाना बनाएका मिसाइल र ड्रोनहरूलाई आकाशमै रोकिएको बताए ।

इरानी सञ्चारमाध्यमले आईआरजीसीलाई उद्धृत गर्दै शनिबार छुट्टै चेतावनी दोहोर्याएका छन् जसमा इरानी ट्यांकरमाथि हुने कुनै पनि आक्रमणले यस क्षेत्रका अमेरिकी केन्द्रहरू र शत्रु जहाजहरूका विरुद्ध बदला लिने चेतावनी दिइएको छ ।

हर्मुज जलयोजक विश्वको सबैभन्दा रणनीतिक रूपमा महत्त्वपूर्ण समुद्री अवरोध बिन्दुहरूमध्ये एक हो जसले विश्वव्यापी तेल ढुवानीको ठूलो हिस्सा ओगटेको छ ।