एजेन्सी । पाकिस्तानको जलसेनाले अरब सागरमा अलपत्र परेको एक भारतीय अफशोर टग र आपूर्ति जहाजका चालक दलका सदस्यहरूलाई मानवीय सहायता प्रदान गरेको छ ।
सुरक्षा स्रोतहरूलाई उद्धृत गर्दै सोमबार डन पत्रिकाले जनाएअनुसार, उद्धार र सहयोग अभियानमा पाकिस्तानी जलसेनालाई पाकिस्तान सामुद्रिक सुरक्षा एजेन्सीले सहयोग गरेको थियो ।
उक्त रिपोर्टका अनुसार, मुम्बईको समुद्री उद्धार र समन्वय केन्द्रले पाकिस्तानी अधिकारीहरूलाई सम्पर्क गरी सहयोगको अनुरोध गरेपछि ६ जना भारतीय र एकजना इन्डोनेसियाली नागरिक सम्मिलित चालक दलका लागि सहायता अभियान सुरु गरिएको थियो ।
स्रोतका अनुसार, ओमानबाट भारततर्फ जाँदै गरेको एमभी गौतम नामक जहाजमा प्राविधिक खराबी आएको जानकारी चालक दलले दिएका थिए ।
अलपत्र परेका चालक दललाई खाद्यान्न, चिकित्सा सहायता र प्राविधिक सहयोग सहितको आपतकालीन सहायता प्रदान गरिएको छ भने जहाजलाई सहयोग गर्ने प्रयासहरू जारी रहेको रिपोर्टमा उल्लेख छ ।
गत महिना पनि पाकिस्तानी जलसेनाले अरब सागरमा एक आपतकालीन सन्देश प्राप्त गरेपछि एक व्यापारिक जहाजबाट विदेशी नागरिकहरू सहित १८ जना चालक दलका सदस्यहरूको उद्धार गरेको थियो ।
प्रतिक्रिया