आजदेखि काठमाडौं महानगरले रात्रिकालीन बस सेवा सञ्चालनमा ल्याउँदै

काठमाडौं । काठमाडौं उपत्यकामा वैशाख १ गते अर्थात् आजदेखि रात्रिकालीन बस सेवा सञ्चालन हुने भएको छ । काठमाडौं महानगरपालिकाले साझा यातायातसँगको सहकार्यमा मंगलबारदेखि लागू हुनेगरी बेलुका ८ बजेदेखि ११ बजेसम्म रात्रिकालीन बस सेवा सञ्चालनमा ल्याउन लागेको हो ।

सुरुमा दुईवटा रुटमा बस चल्नेछ । जसमा ललितपुरको लगनखेल, पाटन अस्पताल, अल्का, नर्भिक, प्रसूति गृह, ट्रमा सेन्टर, वीर अस्पताल, कान्ति अस्पताल, टिचिङ् अस्पताल, गंगालाल हृदय केन्द्र हुँदै बूढानीलकण्ठसम्म एउटा रुट हुनेछ ।

यस्तै थानकोटदेखि सतुंगल, कलंकी, कालीमाटी, त्रिपुरेश्वर, थापाथली, माइतीघर मण्डला, बानेश्वर, मीनभवन, तीनकुने हुँदै अन्तरराष्ट्रिय विमानस्थलसम्म अर्को रुटमा रात्री बस चल्नेछ । यी दुई रुटमा ४ वटा रात्रीकालीन विद्युतीय बस सञ्चालन हुनेछन् ।

तोकिएको रुटका बस स्टपहरुमा हरेक २० मिनेटको अन्तरमा बस आउनेछन् । बसमा सीसीटिभी क्यामरा जडान हुनेछन् । सुरक्षाका लागि नगर प्रहरी हुने महानगरपालिकाले जनाएको छ ।