युद्धविराम भए पनि अमेरिकी हतियारहरू पश्चिम एसियामा तैनाथ रहने ट्रम्पको भनाइ

एजेन्सी । अमेरिकाका राष्ट्रपति डोनल्ड ट्रम्पले वास्तविक सम्झौता पूर्ण रूपमा पालना नभएसम्म अमेरिकी जहाज, विमान र कर्मचारीहरू इरान र त्यसको आसपास तैनाथ रहने बताएका छन् ।

उनले सम्झौतामा गरिएको कुनै पनि उल्लंघनले धेरै कडा सैन्य प्रतिक्रिया निम्त्याउन सक्ने चेतावनी दिँदै हर्मुज जलयोजक खुला र सुरक्षित रहनुपर्ने कुरामा पुनः जोड दिएका छन् ।

आफ्नो ट्रुथ सोसल अकाउन्टमा उनले लेखे, ‘पहिले नै धेरै हदसम्म कमजोर भइसकेको शत्रुको घातक कारबाही र विनाशका लागि उपयुक्त र आवश्यक पर्ने गोलाबारुद, हतियार र अन्य सबै सामग्रीहरू इरान र त्यसको आसपास तबसम्म तैनाथ रहनेछन्, जबसम्म वास्तविक सम्झौता पूर्ण रूपमा पालना हुँदैन ।

कुनै कारणवश यसको पालना भएन भने (जुन हुने सम्भावना निकै कम छ), तब कसैले कहिल्यै नदेखेको विशाल, राम्रो र शक्तिशाली गोलाबारी सुरु हुनेछ । यो धेरै पहिले नै सहमति भइसकेको कुरा हो र यसको विपरीत गरिएका सबै नक्कली बयानबाजीका बाबजुद इरानमा कुनै आणविक हतियार हुनेछैन र हर्मुज जलयोजक खुला र सुरक्षित रहनेछ ।

यसैबीच, हाम्रो महान् सेना तयारी गर्दै र आराम गर्दैछ । र ऊ वास्तवमा आफ्नो अर्को विजयको प्रतीक्षा गरिरहेको छ । अमेरिका इज ब्याक !’