जिसस क्राइस्टको पार्थिव शरीर बेरिएको भनिएको कपडामा भेटियो भारतीय डीएनए

एजेन्सी । जिसस क्राइस्टलाई गाड्दा प्रयोग गरिएको कपडा भनी विश्वास गरिने टुरिनको कफन (श्राउड अफ टुरिन) धेरै मानिसहरूमाझ शताब्दीयौंदेखि आकर्षण र बहसको विषय बनेको छ ।

न्यु साइन्टिस्टको रिपोर्ट अनुसार, हालै गरिएको डीएनए विश्लेषणले ४.४ मिटर लामो र १.१ मिटर चौडा यो कफनको उत्पत्ति भारतबाट भएको हुन सक्ने संकेत गरेको छ ।

इटलीको पाडोवा विश्वविद्यालयका अनुसन्धानकर्ताहरूले सन् १९७८ मा कफनबाट संकलन गरिएको सामग्रीको विश्लेषण गरे । कपडामा पाइएको मानव डीएनएको लगभग ४० प्रतिशत भारतीय वंशको रहेको पत्ता लगाए ।

यसले यो कफन बुन्न प्रयोग गरिएको धागो प्राचीन भारतको सिन्धु उपत्यका क्षेत्रबाट उत्पत्ति भएको हुन सक्ने अनुमान गरिएको छ ।

गियान्नी बारकासियाले सन् २०१५ मा आफ्ना सहकर्मीहरूसँग यसको अध्ययन गर्दा यो लिनन कपडाको भारतसँग सम्बन्ध रहेको प्रस्ताव पहिलोपटक राखेका थिए । अहिले उनी र उनको टोलीले सोही सामग्रीको उस्तै विश्लेषण गरे र फेरि पनि कफनमा मध्यकालीन र आधुनिक डीएनएको ठूलो विविधता सुरक्षित रहेको फेला पारे ।

अध्ययनमा टोलीले लेखेको छ, ‘हाम्रो निष्कर्षले यसको (कफनको) संरक्षण अवस्था र वातावरणीय अन्तर्क्रियालाई उजागर गर्छ जसले विभिन्न जैविक स्रोतहरूबाट उत्पत्ति भएका पहिचान गरिएका आनुवंशिक भेरिएन्टहरूमा महत्त्वपूर्ण दृष्टिकोण प्रदान गर्छ ।’

घरपालुवा बिरालो र कुकुर, कृषि फार्मका जनावरहरू र मृग तथा खरायो जस्ता जंगली जनावरहरू लगायतका आनुवंशिक सामग्रीका अवशेषहरूसँगै अनुसन्धानकर्ताहरूले ग्रे मुलेट, एट्लान्टिक कड र रे–फिन्ड माछा जस्ता केही माछाका प्रजातिहरू पनि फेला पारेका छन् ।

रोमनहरूले सिन्धु उपत्यका क्षेत्रबाट लिनन वा धागो आयात गरेका हुन सक्छन् जसले कफनमा भारतीय डीएनए भित्र्याएको हुन सक्छ । शताब्दीयौंदेखि भारतीय मूलका व्यक्तिहरूले कफन चलाएको वा छोएकाले डीएनए सरेको हुन सक्ने सम्भावना पनि छ ।

‘कफन धेरै व्यक्तिहरूको सम्पर्कमा आएको थियो जसले गर्दा कफनको मौलिक डीएनए पहिचान गर्ने सम्भावनालाई चुनौती दिएको छ,’ उनीहरूले थपे, ‘टुरिनको कफनमा फेला परेका डीएनएका अवशेषहरूले यो कपडा भूमध्यसागरीय क्षेत्रमा व्यापक रूपमा सम्पर्कमा आएको हुन सक्ने र धागो भारतमा उत्पादन भएको हुन सक्ने सम्भावनालाई संकेत गर्छ ।’

टुरिनको कफनको इतिहास जटिल छ जुन पहिलोपटक सन् १३५४ मा फ्रान्समा देखिएको दस्तावेजहरूमा उल्लेख छ ।

त्यसयता, यसलाई इटलीको टुरिनस्थित क्याथेड्रल अफ सेन्ट जोन द ब्याप्टिस्टमा राखिएको छ जसले लाखौं पर्यटकहरूलाई आकर्षित गर्छ र यसको आधिकारिकता बारे गहिरो बहस सिर्जना गरिरहन्छ ।