अमेरिकाले इरानविरुद्ध नयाँ क्षेप्यास्त्र प्रहार गरेको दाबी, साना छर्राले क्षति पुर्याउने

एजेन्सी । न्युयोर्क टाइम्स र हतियार विशेषज्ञहरूले परीक्षण गरेको दृश्य प्रमाणका अनुसार, फेब्रुअरी २८ मा अमेरिकाले विकास गरेको एउटा नयाँ क्षेप्यास्त्रले दक्षिणी इरानको लामर्ड शहरमा रहेको एक सैन्य परिसर नजिकैको स्पोर्ट्स हल र विद्यालयलाई निशाना बनाउँदै नागरिक स्थलहरूमा प्रहार गरेको छ ।

इरानी सञ्चारमाध्यमहरूले स्थानीय अधिकारीहरूलाई उद्धृत गर्दै यस आक्रमणमा कम्तीमा २१ जनाको मृत्यु भएको जनाएका छन् ।

घटनास्थलका भिडियो र फोटोहरूको विश्लेषणले प्रयोग गरिएको हतियार अमेरिकी सेनाद्वारा विकसित छोटो दूरीको ब्यालिस्टिक मिसाइल प्रिसिजन स्ट्राइक मिसाइल भएको संकेत गर्छ ।

यो मिसाइल आफ्नो लक्ष्यभन्दा माथि विस्फोट हुने र साना टङ्स्टन पेलेट्स छरपस्ट पारेर क्षति पुर्याउने गरी डिजाइन गरिएको छ । विशेषज्ञहरूले स्पोर्ट्स हल, विद्यालय र नजिकैका आवासीय क्षेत्रहरूमा भएको क्षतिको स्वरूप नयाँ क्षेप्यास्त्र पीआरएसएमको विशेषतासँग मेल खाने उल्लेख गरेका छन् ।

एक अमेरिकी अधिकारीले न्युयोर्क टाइम्सलाई लामर्ड आक्रमणमा प्रयोग गरिएको मिसाइल पीआरएसएम नै भएको बताएका छन् ।

समाचारपत्रले अन्तर्वार्ता लिएका अन्य हतियार विशेषज्ञहरूले पनि यस मिसाइलको बारेमा आफ्नो विश्लेषण प्रस्तुत गरेका छन् ।
‘हामीलाई पीआरएसएम प्रहार गरिएको थाहा भए पनि यस प्रणालीले गर्ने वास्तविक क्षतिको स्वरूप पहिलोपटक देखिएको हो,’ मिडलवेरी कलेजका आणविक अप्रसार विशेषज्ञ जेफ्री लुइसले घटनाका भिडियो र फोटोहरू हेरेपछि भने ।

अर्का हतियार विशेषज्ञ फ्रेडरिक ग्रासले पनि लुइसको भनाइलाई समर्थन गरे ।

‘टुक्राटुक्रा भएर हुने क्षतिको स्वरूप प्रभावकारी छ र पीआरएसएमको बारेमा उपलब्ध थोरै प्राविधिक जानकारीसँग मेल खान्छ,’ न्युयोर्क टाइम्सले ग्रासलाई उद्धृत गर्दै लेखेको छ ।

अमेरिकी सेन्ट्रल कमान्डका प्रवक्ता क्याप्टेन टिम हकिन्सले न्युयोर्क टाइम्सलाई अमेरिकी सेनाले इरानी शासन जस्तो अन्धाधुन्ध रूपमा नागरिकहरूलाई निशाना बनाउँदैन भनेका छन् ।