अमेरिका र इरानबीच वार्ताको सम्भावना देखिएको चीनको भनाइ

एजेन्सी । चीनका विदेशमन्त्री वाङ यीले टर्की र इजिप्टका समकक्षीहरूसँगको छुट्टाछुट्टै कुराकानीमा अमेरिका र इरानबीच संवादका लागि आग्रह गरेका छन् ।

उनले तेहरान र वाशिङटन दुवैले वार्ताको टेबुलमा फर्कन इच्छुक रहेको संकेत देखाएको बताएका छन् ।

बुधबार ढिलो गरी प्रकाशित बेइजिङको रिपोर्ट अनुसार, वाङले इजिप्टका विदेशमन्त्री बद्र अब्देलाटीलाई भने, ‘अमेरिका र इरान दुवैले वार्ताका लागि इच्छा देखाएसँगै शान्तिको सानो आशा पलाएको छ ।’

इरानका विदेशमन्त्री अब्बास अराग्चीले अहिलेसम्म कुनै वार्ता नभएको आफूहरूको अडान पूर्णतया सैद्धान्तिक रहेको बताउनुभन्दा केही घण्टाअघि यो विज्ञप्ति आएको हो ।

‘अहिले वार्ताको कुरा गर्नु भनेको हार स्वीकार गर्नु हो,’ उनले थपे ।

ट्रम्पले बुधबार इरान शान्ति वार्तामा सहभागी भइरहेको कुरामा जोड दिए । उनले तेहरानको इन्कारीको कारण इरानी वार्ताकारहरू आफ्नै पक्षबाट मारिने डरमा रहेको हुन सक्ने संकेत गरे ।

वाङले टर्कीका विदेशमन्त्री हाकान फिदानसँगको कुराकानीमा पश्चिम एसियाको द्वन्द्वमा को सही र को गलत भन्ने कुरा ऐना जस्तै छर्लंग भएको बताए र वार्ता पुनः सुरु गर्न सहयोग गर्ने प्रतिबद्धता जनाए ।

टर्कीले वाशिङटन र तेहरान दुवैसँग कुरा गरेर युद्ध अन्त्य गर्न तीव्र कूटनीतिक प्रयास गरिरहेको फिदानले मार्चमा बताएका थिए ।

वाङले भने, ‘यस युद्धलाई लम्ब्याउँदा थप हताहती र अनावश्यक क्षति मात्र हुनेछ जसले गर्दा द्वन्द्व अझ बढी फैलिनेछ ।’