एजेन्सी । लियोनल मेस्सी विश्वका सबैभन्दा प्रसिद्ध फुटबल खेलाडी हुन् र उनी कहिल्यै सार्वजनिक रूपमा राजनीतिबारे कुरा गर्दैनन् ।
उनले गत साता अमेरिकाका राष्ट्रपति डोनल्ड ट्रम्पसँगको भेटका क्रममा पनि त्यो मौनता कायम राखे । तर, त्यसले अर्जेन्टिनी सुपरस्टारलाई स्वदेशमा तातो राजनीतिक बहसमा तानिनबाट भने रोक्न सकेन ।
अमेरिकास्थित आफ्नो टोली इन्टर मियामीको सम्मानमा ह्वाइट हाउसमा आयोजित स्वागत समारोहमा मेस्सी अलि अप्ठ्यारो मान्दै मुस्कुराए जब ट्रम्पले सो अवसरलाई इरानको सैन्य विनाश र क्युबामा सत्ता परिवर्तनको बारेमा कुरा गर्न प्रयोग गरे ।
यसले इन्टर मायामीको सन् २०२५ एमएलएस कप विजयको सामान्य उत्सवलाई एक ध्रुवीकृत राजनीतिक विवादमा परिणत गरिदियो ।
ट्रम्प प्रशासनका प्रमुख सहयोगी अर्जेन्टिनाका राष्ट्रपति हाभियर मिलेईले आफ्नो देशका सबैभन्दा चर्चित फुटबल नायक र ट्रम्पबीचको हातमिलाइको प्रशंसा गरे । त्यही समयमा ट्रम्पका आलोचकहरूले मेस्सीलाई विवादित अमेरिकी राष्ट्रपतिसँग नजिकिएको आरोप लगाए ।
‘यो गालामा थप्पड हाने जस्तो महसुस भयो,’ अर्जेन्टिनाका पूर्व फुटबल प्रशिक्षक तथा लामो समयदेखि टिप्पणीकार रहँदै आएका एन्जल काप्पाले धिक्कार छ मेस्सी शीर्षकको ब्लग पोस्टमा लेखे ।
आफ्नो दुई दशक लामो फुटबल करियरमा मेस्सीले राजनीतिबाट टाढा रहन निकै प्रयास गरेका छन् र उनले ह्वाइट हाउसको कार्यक्रमबारे कुनै टिप्पणी गरेका छैनन् । इन्टर मायामीका प्रतिनिधिहरूले टिप्पणीका लागि गरिएको अनुरोधको जवाफ दिएनन्।
कतिपय अमेरिकी खेलकुद टोली र खेलाडीहरूले आफू सहमत नभएका राष्ट्रपतिहरूलाई भेट्नबाट जोगिन वा मेस्सीले सामना गरे जस्तै छानबिनमा पर्नबाट बच्न ह्वाइट हाउस जाने कार्यक्रम रद्द गर्ने गरेका छन् ।
सामाजिक सञ्जाल, पत्रपत्रिका र रेडियो तथा टेलिभिजन कार्यक्रमहरूमा अर्जेन्टिनीहरूले ट्रम्पसँगको उपस्थितिमा मेस्सीको हाउभाउको सूक्ष्म परीक्षण गरिरहेका छन् ताकि ट्रम्पको युद्धपरस्त भाषणका क्रममा उनी कत्तिको असहज वा सहज देखिएका थिए भन्ने पत्ता लगाउन सकियोस् ।
मेस्सीको दशकौं लामो राजनीतिक तटस्थताको प्रतिबद्धता तब व्यर्थ जस्तै देखियो जब अर्जेन्टिनाका वामपन्थी र दक्षिणपन्थीहरूले उनलाई ट्रम्पवादको पक्षमा उभ्याउन खोजे ।
‘अर्जेन्टिनाका सबैभन्दा ठूला राष्ट्रिय आदर्श व्यक्तित्व समेत दक्षिणपन्थी हुन्,’ अर्जेन्टिनाका एक प्रख्यात दक्षिणपन्थी बुद्धिजीवी अगस्टिन लाजेले सामाजिक सञ्जाल एक्समा लेखे ।
यो बहस अर्जेन्टिनाको सिमानाभन्दा बाहिरसम्म फैलियो । तर, यस भेटघाटलाई राजनीतीकरण गर्नेहरूमध्ये सबैभन्दा ठूलो स्वर मिलेईको थियो । उनले वर्षौंदेखि यी फुटबल च्याम्पियनको प्रशंसा गरेपछि अन्ततः आफ्ना वामपन्थी शत्रुहरूका विरुद्ध उनलाई एक शक्तिशाली अस्त्रको रूपमा प्रयोग गर्ने बाटो भेटाएको देखियो ।
‘मेस्सीको मात्रै देब्रे (बायाँ) चल्छ,’ मिलेईले सामाजिक सञ्जालमा लेखे जसमा उनले मेस्सीको देब्रे खुट्टाको खेललाई संकेत गर्दै राजनीतिक वामपन्थी विचारधारामाथि प्रहार गरे ।
मिलेईले सन् २०१८ को एउटा टेलिभिजन क्लिप फेरि सार्वजनिक गरे जसमा उनले सन् २०१८ को विश्वकपमा अर्जेन्टिना चाँडै बाहिरिएपछि भएको आलोचना विरुद्ध मेस्सीको जोडदार बचाउ गरेका थिए । उनले एक पोस्टमा आलोचकहरूको निन्दा गर्दै भने, ‘उनीहरू मदुरो, हमास र क्युबालाई माया गर्छन् । उनीहरू मेस्सीलाई घृणा गर्छन् । उनीहरू दुष्ट हुन् ।’
मिलेईले आफूलाई दक्षिणपन्थी विचारधाराको विश्वव्यापी नेताका रूपमा प्रस्तुत गर्न खोजिरहँदा लामो समयदेखि अर्जेन्टिनाका सबैभन्दा चिनिएका अन्तर्राष्ट्रिय व्यक्तित्वसँग आफूलाई जोड्ने प्रयास गरेका छन् । तर, उनले अहिलेसम्म राष्ट्रिय पुरुष टोलीका कप्तान मेस्सीसँग तस्विर खिचाउन भने सकेका छैनन् ।
‘ट्रम्पसँगको मेस्सीको तस्विर मिलेईका लागि एक किसिमको परोक्ष सन्तुष्टि हो,’ अर्जेन्टिनी समाजशास्त्री पाब्लो अलाबारसेसले भने, ‘यसले मेस्सीलाई कट्टर दक्षिणपन्थीहरूको घेरामा पुर्याउँछ ।’
अन्य फुटबल विज्ञहरूले भने यस बहसलाई मत्थर पार्ने प्रयास गरे । अमेरिकाको ठूलो स्पेनिश–भाषी मिडिया टेलिमन्डोका फुटबल कमेन्टेटर एन्ड्रेस क्यान्टरले मेस्सी आफ्नो नभई अर्को देशको राष्ट्रपतिबाट पुरस्कार ग्रहण गर्ने टोलीको कप्तान भएको कुरा औंल्याए ।
‘उनको हाकिम भनेको टोलीको मालिक हो । उनले र उनका टोलीका साथीहरूले ह्वाइट हाउसबाट निमन्त्रणा पाए र उनीहरूले सोही अनुसार प्रतिक्रिया दिए,’ क्यान्टरले भने, ‘हामीलाई थाहा छैन उनी राजनीतिको कुन पक्षमा छन् ।’
मेस्सी लगायत धेरै खेलाडीहरूको मातृभाषा अंग्रेजी नभएकाले उनीहरूले ट्रम्पको भाषण कति बुझे भन्ने कुरा पनि स्पष्ट छैन ।
मेस्सीलाई अर्को एउटा कुराबाट उम्कन गाह्रो भइरहेको छ, त्यो हो आफ्ना पूर्ववर्ती राष्ट्रिय फुटबल आइकन डिएगो म्याराडोनासँगको तुलना । सन् २०२० मा निधन भएका ती स्टार मैदानमा जादुमयी थिए तर मैदान बाहिर एक विवादास्पद व्यक्तित्व थिए । उनले श्रमिक वर्गको छिमेकमा हुर्केका कारण गरीबहरूको वामपन्थी समर्थकको रूपमा आफ्नो छवि बनाएका थिए ।
धेरै वर्षसम्म सन् १९८६ को विश्वकपमा म्याराडोनाको जीतले अर्जेन्टिनाको महान खेलाडी को हो भन्ने बहसमा उनलाई अगाडि राख्यो । तर, जब मेस्सीले सन् २०२२ मा अर्जेन्टिनालाई विश्वकप जिताए, त्यसले प्रभावकारी रूपमा यसको छिनोफानो गरिदियो ।
ह्वाइट हाउस भ्रमणपछि ती तुलनाहरू पुनः सतहमा आए । मेस्सीको इन्स्टाग्राम पेजमा दशौं हजार लाइक पाएको एउटा कमेन्टमा लेखिएको थियो, ‘ट्रम्पसँग हात मिलाएकोमा धन्यवाद । यसबाट डिएगो किन अहिलेसम्मकै महान् खेलाडी हुन् भन्ने कुरा एकदमै स्पष्ट हुन्छ ।’
यो आक्रोश यस कारण पनि बढ्यो किनकि सन् २०२२ को विश्वकप जितेपछि मेस्सी र उनका टोलीका साथीहरू अर्जेन्टिनाको राष्ट्रपति निवास गएका थिएनन् । त्यतिबेला मध्य–वामपन्थी अल्बर्टो फर्नान्डेज राष्ट्रपति थिए । फर्नान्डेजले एक फुटबल युट्युब च्यानलमा सरकारले उनीहरूलाई आउन नभनेको बताए ।
ट्रम्पसँगको भेटका विषयमा मेस्सीलाई शंकाको लाभ दिन तयार रहेका विज्ञहरूले समेत फुटबल र सैन्य विनाशको बारेमा राष्ट्रपतिको प्रवचनलाई मिसाउनु अलि नमिलेको बताए ।
‘फुटबलमा केही भ्रम र जादू जस्तो कुरा हुन्छ,’ अर्जेन्टिनी फुटबल टिप्पणीकार मार्सेला मोरा वाई आराउजोले भनिन्, ‘र यो (ह्वाइट हाउसको घटना) खेलको सुन्दरताबाट निकै टाढा थियो ।’
प्रतिक्रिया