काठमाडौं । कास्कीको पोखरा महानगरपालिकाका मेयर धनराज आचार्यले नवनिर्वाचित प्रतिनिधिसभा सदस्य महावीर पुनलाई सांसदको जिम्मेवारीबारे ध्यानाकर्षण गराएका छन् ।
मेयर आचार्यले सांसदको मुख्य भूमिका पुस्तक बिक्री गर्ने नभई देशका लागि नीति र कानुन निर्माण गर्नु भएको बताएका छन् ।
म्याग्दीबाट प्रतिनिधिसभा सदस्यमा निर्वाचित पुनले गत सोमबार पोखराको सडक किनारमा उभिएर आफ्नै पुस्तक बिक्री गरेको विषय सार्वजनिक भएपछि त्यसलाई लिएर विवाद भएको थियो । त्यसपछि मेयर आचार्यले बुधबार सामाजिक सञ्जाल फेसबुकमार्फत प्रतिक्रिया दिएका हुन्।
आचार्यले लेखेका छन्, ‘माननीयज्यू, अब तपाईंको भूमिका देशका लागि नीति र कानुन निर्माण गर्ने हो। पुस्तक व्यवसायीको भूमिका भने पुस्तक बिक्री–वितरण गर्ने हो ।’
उनले पुनसँग पुस्तकको स्टक उपलब्ध गराइए पुस्तक व्यवसायी महासंघमार्फत बिक्री गरेर उचित भुक्तानी उपलब्ध गराउन सहजीकरण गर्न सकिने प्रस्ताव पनि गरेका छन्।
‘यदि तपाईंको पुस्तकको स्टक उपलब्ध गराउनु भयो भने हामी महासंघमार्फत त्यसलाई बिक्री गरी उचित भुक्तानी तपाईंलाई उपलब्ध गराउन सहजीकरण गर्न सक्छौं,’ उनले उल्लेख गरेका छन्।
आचार्यले हालसम्म बिक्री–वितरण भएका पुस्तकको विवरण सार्वजनिक गरिए पारदर्शिता बढ्ने र कर भुक्तानी सम्बन्धी उठ्न सक्ने प्रश्नहरूको पनि सहज रूपमा जवाफ दिन सकिने बताएका छन्।
साथै, उनले पुनको अभियान र उद्देश्यप्रति सम्मान व्यक्त गर्दै आवश्यक सहयोग र सहकार्यका लागि आफू सदैव तयार रहेको पनि बताएका छन् ।
यस्तो छ मेयर आचार्यको भनाइ
ध्यानाकर्षण !!
माननीय महावीर पुनज्यू,
हार्दिक नमस्कार।
सर्वप्रथम, अत्यधिक मतसहित विजयी हुनुभएकोमा हार्दिक बधाई तथा आगामी कार्यकालको सफलताको हार्दिक शुभकामना व्यक्त गर्दछु।
यहाँको देश र समाजप्रतिको समर्पण, सादगीपन र पवित्र उद्देश्यप्रति हामी सबैको उच्च सम्मान छ। नवप्रवर्तन र अनुसन्धानको अभियानका लागि देशभरि घुमेर पुस्तक बिक्री गर्दै जनसमर्थन जुटाइरहनु भएको कार्य सराहनीय छ। वास्तवमा, तपाईंको अभियानलाई सहयोग गर्ने भावनाले नै धेरैले उत्साहपूर्वक पुस्तक खरिद गरिरहेका छन्।
तर, बिना दर्ता वा आवश्यक अनुमति कुनै पनि वस्तुको बिक्री–वितरण गर्नु कानुनी रूपमा जटिल हुन सक्छ भन्ने कुरा तपाईंलाई अवगत नै छ। पछिल्ला केही दिनमा सडकमा उभिएर पुस्तक बिक्री गर्दा यातायातमा असहजता भएको तथा केही अनावश्यक सवाल–जवाफ भएको देखिएको छ, जुन तपाईं जस्तो सम्मानित व्यक्तित्वलाई सुहाउने अवस्था होइन।
आज तपाईं केवल महावीर पुन मात्र नभई देशले सम्मान गरेको एक आदरणीय व्यक्तित्व र सार्वजनिक नेतृत्वको स्थानमा हुनुहुन्छ। देशभर करिब १८ हजार पुस्तक व्यवसायी छन्, जो राज्यका विभिन्न निकायमा दर्ता भई लेखकहरूका पुस्तक बिक्री–वितरण गर्दै आएका छन्।
यदि तपाईं पोखरा आउने समय दिनुहुन्छ भने, पुस्तक व्यवसायी महासंघमार्फत तपाईंलाई सहज र उपयुक्त स्थान उपलब्ध गराई पुस्तक बिक्री–वितरणमा सहयोग गर्न सकिनेछ। यसले तपाईंको अभियानलाई अझ व्यवस्थित र प्रभावकारी बनाउने विश्वास लिएका छौँ।
फुटपाथमा साना व्यवसाय गर्ने व्यक्तिहरूलाई नगर प्रहरीले नियमअनुसार हट्न अनुरोध गर्दा, त्यही नियम तपाईंमाथि पनि लागू हुँदा अनावश्यक विवाद सिर्जना हुनु उपयुक्त देखिँदैन। त्यसैले माननीयज्यू, अब तपाईंको भूमिका देशका लागि नीति र कानुन निर्माण गर्ने हो र पुस्तक ब्यबसायिको भूमिका पुस्तक बिक्री–वितरण गर्ने हो। यदि तपाईंको पुस्तकको स्टक उपलब्ध गराउनु भयो भने, हामी महासंघमार्फत त्यसलाई बिक्री गरी उचित भुक्तानी तपाईंलाई उपलब्ध गराउन सहजीकरण गर्न सक्छौँ।
साथै हालसम्म कति पुस्तक बिक्री–वितरण भयो भन्ने विवरण सार्वजनिक गर्न सकिएमा पारदर्शिता बढ्नुका साथै कर भुक्तानीसम्बन्धी उठ्न सक्ने प्रश्नहरूको पनि सहज जवाफ प्राप्त हुन सक्नेछ।
पुनः, तपाईंको अभियान र उद्देश्यप्रति हाम्रो उच्च सम्मान व्यक्त गर्दै सहयोग र सहकार्यका लागि सदैव तयार रहेको जानकारी गराउन चाहन्छौँ।
धनराज आचार्य
पोखरा ।
प्रतिक्रिया