एजेन्सी । टर्कीका राष्ट्रपति रेचेप तैयिप एर्दोआनले इटलीकी प्रधानमन्त्री जोर्जिया मेलोनीलाई इजिप्टको शर्म एल शेखमा भेट्दा दिएको सुझावको चर्चा भइरहेको छ ।
‘तपाईं गजबकी देखिनुहुन्छ,’ उनले भने, ‘तर मैले तपाईंलाई चुरोट तान्न छोडाउनुपर्छ ।’
गाजा शान्ति शिखर सम्मेलनमा सहभागी हुन उनीहरू त्यहाँ पुगेका थिए ।
आफूले चुरोट तान्न छोड्ने हो भने कसैलाई मार्नुपर्ने हुन्छ भनी मेलोनीले ठट्यौली गरेकी थिइन् ।
आफूलाई चुरोट तान्ने बानी छोड्न गाह्रो परिरहेको मेलोनीले स्वीकार गरेकी छन् ।
एर्दोआनले मेलोनीलाई चुरोट छोड्न भन्दा बेलायतका प्रधानमन्त्री सर केर स्टार्मर र फ्रान्सका राष्ट्रपति इम्मानुएल म्याक्रोन हाँसेका थिए ।
त्यसको जवाफमा मेलोनीले भनिन्, ‘मलाई थाहा छ, थाहा छ । म कसैलाई पनि मार्न चाहन्नँ ।’
हालै प्रकाशित संस्मरणमा मेलोनीले १३ वर्षको अन्तरपछि फेरि चुरोट तान्न थालेको उल्लेख गरेकी छन् ।
यसरी चुरोट तान्दा अरू मुलुकका नेतासँग घुलमिल हुन सजिलो भएको उनको दाबी छ ।
अमेरिकाका राष्ट्रपति डोनल्ड ट्रम्पले पनि सोमबारको सम्मेलनमा मेलोनीको रूपरंगको प्रशंसा गरेका थिए ।
प्रतिक्रिया