सिटिजन लाइफ वीमेन्स फोरमद्वारा आयोजित लैंगिक हिंसा सम्बन्धी कार्यक्रम सम्पन्न

काठमाडौं । लैंगिक हिंसाविरुद्ध १६ दिने अभियानको क्रममा सिटिजन लाइफ इन्स्योरेन्स कम्पनीले कम्पनीमा कार्यरत महिला कर्मचारीहरूलाई उत्कृष्ट कार्यस्थल बनाउने विषयमा छलफल र परामर्श गरेको छ । छलफलमा सहभागीहरुले यसका लागि आवश्यक पहल गरी समस्या समाधानमा आवश्यक भूमिका खेल्ने बताएका थिए ।

कम्पनीको सातौँ वार्षिक उत्सवको अवसरमा ११ जना सदस्यसहितको वीमेन्स फोरम पनि गठन गरिएको छ । यस कम्पनीमा कार्यरत महिला कर्मचारीहरूलाई उत्कृष्ट कार्यस्थल बनाउन समन्वय गर्ने, त्यसबारे आवश्यक पहल गरी त्यस्ता विषयहरूमाथि छलफल गर्ने र समस्याहरू देखिएमा समाधान प्रदान गर्न आवश्यक भूमिका खेल्ने उद्देश्यले वीमेन्स फोरम गठन गरिएको बताइएको छ ।

सिटजन लाइफले विश्वव्यापी रूपमा चलिरहेको लैङ्गिक हिंसाविरुद्धको १६ दिने अभियानलाई मध्यनजर गर्दै शूक्रबार कम्पनीको प्रधान कार्यालयमा ‘हामी सबैको प्रतिवद्धताः लैङ्गिक हिंसा अन्त्यको ऐक्यवद्धता’को विषयमा कार्यक्रम सम्पन्न गरेको हो ।

कार्यक्रमको मूख्य श्रोत व्यक्तिको रूपमा राष्ट्रिय महिला आयोगकी सचिव पार्वती अर्यालले लैङ्गिक हिंसाको प्रकार, कार्यस्थलमा हुने लैङ्गिक हिंसा र व्यवसायिक संस्थाहरूले अपनाउनुपर्ने कानुनी व्यवस्थाबारे विस्तृत रूपमा प्रशिक्षित गरिन् ।

कार्यक्रममा प्रत्यक्ष र अनलाइनमार्फत उपस्थित १७८ जना सिटिजनका कर्मचारीहरूलाई लैङ्गिक हिंसाविरुद्ध ऐक्यबद्धता भएर काम गर्न उनले प्रोत्साहनसमेत गरिन् । सचिव अर्यालले, लैङ्गिक हिंसा महिलाहरू माथि मात्र नभइ पुरुषहरूमाथि पनि हुने भएको र यसबारे कसरी बच्ने र भएको खण्डमा कसरी कानुनी रूपमा अघी बढ्ने भन्ने बारेमा पनि जानकारी दिइन् ।

फोरमको संयोजक रिता पाठकले आचारसंहिता तयार गरी महिलाहरूको भूमिकालाई प्रोत्साहन र समर्थन गर्ने प्रतिबद्धता जनाउँदै लैङ्गिक हिंसाको पिडितलाई आवाज उठाउन अनूरोध गर्नूभयो र फोरमले आउने समयहरूमा यस्तै शैक्षिक कार्यक्रमहरू सञ्चालन गरिने र संस्थागत सामाजिक उत्तरदायित्वको अनुरूप विभिन्न कार्यहरू गर्ने भविष्यको सोच रहेको बताइन् ।