चीनमा ६८औं राष्ट्रिय दिवस मनाइँदै, देशभर साताव्यापी सार्वजनिक बिदा

बेइजिङ्ग । चीनले आइतबार आफ्नो स्थापनाको ६८ औँ राष्ट्रिय दिवस मनाउदै छ । सो राष्ट्रिय दिवस मनाउने एक साताव्यापी कार्यक्रम आजबाट शुरु भएको छ ।

चीनले अफ्नो स्थापनाको ६८ औँ दिवस मनाउन चीनको तियानमेन स्क्वायरमा विशेष कार्यक्रम गरेको थियो । बादशाही शासनकालबाट मुक्त भै जनवादी गणतन्त्र चीन स्थापना भएको आज ६७ बर्ष पुगी ६८ औं बर्ष प्रवेश भएको हो ।

तियानमेत स्क्वायरमा आइतबार बिहान ६ः०५ बजे विशेष समारोहको आयोजना गरी सो समारोहमा झण्डोत्तोलन गरिएको थियो ।

साप्ताहिक कार्यक्रम शुरुवातीको पहिलो दिन आज राष्ट्रिय झण्डोत्तोलन अवलोकन गर्न देशभरबाट करिब १ लाख  १५ हजार मानिसहरु बिहानैदेखि बेइजिङ्गको तियान्मेन चोकमा भेला भएका छन् ।

हरेक बर्ष तियानमेन स्क्वायरमा चीनको राष्ट्रिय दिवस मनाउन यस्तै विशेष कार्यक्रमको आयोजना गर्ने गरिएको छ । तियानमेन स्क्वायर चीनको राजनीतिक परिवर्तनमा विशेष स्थान मानिन्छ ।

सो स्थानमा आइतबार बिहान चिनियाँ सैनिकले झण्डा उठाएर चीनको स्थापना दिवसको स्वागत गरेपछि विशेष सैनिक परेड सुरु भएको थियो । आज बिहान घाम झुल्केसँगसँगै राष्ट्रिय धूनकाबीच पाँच तारे राष्ट्रिय ध्वजा उठाई झण्डोत्तोलन गरियो ।

राष्ट्रिय झण्डोत्तोलनका क्रममा, १७ मिटर (५६ फिट) अग्लो पारी झण्डाको पृष्ठभूमिमा झुण्ड्याइएका विभिन्न फल र फूलः पाँचवटा ताराको प्रतीकस्वरुप – हलुवाबेत, अनार, स्याउ, पियोनी (बिशेष प्रकारको चिनियाँ फूल) तथा चिनियाँ गुलाफको फूलका बिशाल टोकरीबाट पुष्प र फलको बृष्टि गरिएको छ ।

शान्ति, समृद्धि र प्रगतिको प्रतिकका रुपमा ती फल र फूलहरु प्रदर्शन गरिएको थियो । त्यहाँ उपस्थित नागरिकहरुले राष्ट्रभक्तिका अभिव्यक्तिहरु दिने तथा तियानमेन स्क्वायरको ऐतिहासिकता झल्काउने गरी राखिएका प्राचीन बस्तु, पुराना दरबार तथा बनोटहरु हेर्ने गर्दछन् ।

चोकमा भेला भएका अपार जनसमूहले देशभक्ति तथा राष्ट्रप्रेमले ओतप्रोत भै मौनतापूर्वक उक्त कार्यक्रम अवलोकन गरेका छन् । साथै, चीन भ्रमणमा आएका पर्यटकहरुले समेत सो कार्यक्रम खुशीपूर्वक, अत्यन्तै चाख मानेर हेरेका थिए ।

राष्ट्रिय दिवशको उपलक्षमा चीन सरकारले देशभर साताव्यापी सार्वजनिक बिदाको घोषणा गरेको छ । यस बर्षको परम्परागत चिनियाँ मध्य–शरद पर्व (मिड–अटम फेस्टिभल) वा मून केक फेस्टिभल आगामी अक्टोबर ४ मा पर्दैछ । सो पर्वलाई समेत ध्यानमा राखी उक्त सातदिने सार्वजनिक बिदाको घोषणा गरिएको हो ।

हामी नेपालीको दशैं, तिहारको चाड जस्तै चीनमा मिड–अटम वा मून केक फेस्टिभलमा परिवारका सदस्यहरु जहाँ भए पनि एकै ठाउँमा भेला भै मनाउने गरिन्छ । आइतबार बिहानका दृश्यहरु पनि यस्तै रहेका त्यहाँबाट प्राप्त विभिन्न अन्तर्राष्ट्रिय सञ्चारमाध्यमहरुले जनाएका छन् ।