हात्ती भगाउन रातभर जाग्राम

कञ्चनपुर । कञ्चनपुरको दोधारा चाँदनी नगरपालिका–३ बडुवाल टोलका स्थानीय हात्ती भगाउन रातभर जाग्राम बस्ने गरेका छन् । भारतको दुधुवा राष्ट्रिय निकुञ्जबाट आउने जङ्गली हात्तीको बथानले गाउँ पसेर धानबाली र मकैमा नोक्सान गर्न थालेपछि हात्ती भगाउन उनीहरु रातभर जाग्राम बस्न थालेका हुन् ।

साँझपख आउने हात्तीको बथानले अन्न बालीमा नोक्सान पुर्‍याउने गरेको वडाध्यक्ष हरिसिंह धनाडीले जानकारी दिए । ‘हात्तीको बथानले धानबाली र मकैमा ठूलो नोक्सान गरिसक्यो,’ उनले भने, ‘एक जनाको घरमा क्षति पुगेको छ, अन्न बालीमा धेरै नोक्सान पुगाएको छ ।’

रातिको समयमा भारतको दुधुवा राष्ट्रिय निकुञ्जबाट ३०–३५ वटा हात्तीको बथान बच्चासहित दिनहुँ बडुवाल टोलमा पस्ने गरेको उनले बताए । ‘हात्ती भगाउन यहाँका स्थानीय आगो बालेर रातभर जाग्राम बस्ने गरेका छन्,’ उनले भने, ‘यहाँका जनतालाई धेरै दुःख छ राज्यका तर्फबाट हात्ती रोकथामका लागि केही गर्न सकिएको छैन ।’ उनले हात्ती भगाउन यहाँ समूहमा युवाले रातिको समयमा गस्ती गर्ने गरेको बताए ।

स्थानीय लक्ष्मी रानाले हात्तीले हरेक वर्ष यहाँ घरखेतमा नोक्सान गर्ने गरेको बताइन् । ‘धान र मकै सबै सखाप पारिसक्यो घरमा पस्ने डरले रातभर जाग्राम बस्छौँ,’ उनले भनिन्, ‘हात्तीकै कारण यहाँ खेतसमेत बाँझो हुन थालेको छ ।’

गाउँमा हात्तीको आतङ्कले स्थानीय त्रसित भएको उनले बताइन् । ‘यो बस्तीमा भारतीय सीमा पर्ने भएकाले भारतले तारबार गर्न दिँदैन,’ उनले भनिन्, ‘हरेक वर्ष यहाँ भारतीय जंगलबाट हात्ती आउँछन् नोक्सान गरेर जान्छन् ।’

अहिले जंगल पनि घना भइसकेकाले हात्ती बढी आउन थालेको उनले बताइन् । हात्तीले वेदकोट नगरपालिका र लालझाडी गाउँपालिकामा समेत किसानको धानबालीमा नोक्सान पुर्‍याउने गरेको छ ।