बिक्रेताको दबाबमा सेयर बजार, इन्डेक्ससँगै कारोबार रकमले दिएन साथ

काठमाडौं । सेयर बजारमा भारी गिरावट आएको छ । बजारमा गिरावट आउँदा कारोबार रकमले पनि साथ दिएको छैन । यो दिन बजारसँगै कारोबार रकममा गिरावट देखिएको हो ।

बुधबारको कारोबारमा बिक्रेता हावी हुँदा बजारमा दबाब सृजना भएको देखिएको छ । जसले गर्दा बजारले दोहोरो अंकको गिरावटको समाना गरेको छ । बजार मापन गर्ने सूचक ३८.३५ अंकले घटेर परिसूचक २८९८.३१ बिन्दुमा रोकिएको छ । यो दिनको कारोबार बजार २९०० अंकको बिन्दुबाट ओरालो झरेको छ । लामो समयपछि बजारले २९०० बिन्दु पार गरेपछि पुन त्यो बिन्दुबाट झरेको छ ।

२२८ कम्पनीको १ करोड १८ लाख ३७ हजार २१५ कित्ता सेयर ६ अर्ब २ करोड १३ लाख ११ हजार ८८१ रुपैयाँको सेयर किनबेच भएको छ । कारोबारमा बुद्धभुमी नेपाल हाईड्रोपावरको सेयर मूल्य ९.९७ प्रतिशतले बढेको छ भने सामलिङ पावर कम्पनीको सेयर मूल्य ९.९६ प्रतिशतले बढेको छ । बुधबारको कारोबारमा यी दुई कम्पनीको सेयर मुल्य मात्रै सकारात्मक सर्किट तहमा कारोबार भएको छ ।

यो दिनको कारोबारमा साङग्रिला डेभलपमेन्ट बैंक, सेञ्चुरी कमर्शीयल बैंक छ्याङदी हाईड्रोपावर कम्पनीका लगानीकर्ताले कमाएका छन् । यस्तै घलेम्दी हाइड्रो नेपाल, कालिका लघुवित्त वित्तीय संस्था, ग्लोबल आइएमई समुन्नत योजना-२, मध्येभोटेकोशी जलविद्युत कम्पनीको सेयर मूल्यमा गिरावट आएको छ । यी कम्पनीका लगानीकर्ताले गुमाएका छन् ।