एजेन्सी । केम्यान टापुमा अवस्थित वाल्ट डिज्नीको स्वामित्वमा रहेको स्टार ग्रुप लिमिटेडले मार्चमा समाप्त भएको त्रैमासिकमा भारतीय रिजर्भ बैंकको स्वचालित मार्गअन्तर्गत जियोस्टार इन्डिया (जसलाई पहिले स्टार इन्डिया भनिन्थ्यो) मा १२३ करोड भारु (करिब २ अर्ब रुपैयाँ) प्रत्यक्ष वैदेशिक लगानी भित्र्याएको छ ।
उद्योग र आन्तरिक व्यापार प्रवर्धन विभाग (डीपीआईआईटी) को तथ्यांक अनुसार यो जानकारी प्राप्त भएको हो ।
जियोस्टार इन्डिया रिलायन्स इन्डस्ट्रिज लिमिटेड (आरआइएल), वाल्ट डिज्नी र बोधी ट्री सिस्टम्स बीचको एउटा संयुक्त पहल हो । यसमा आरआईएलको ५६ प्रतिशत, डिज्नीको ३७ प्रतिशत र बोधी ट्री सिस्टम्सको ७ प्रतिशत सेयर हिस्सा रहेको छ ।
डिज्नीले यसअघि स्टार यूएस होल्डिङ्स सबसिडियरी एलएलसी मार्फत सन् २०२४–२५ को पहिलो त्रैमासिकमा २८ सय ३९ करोड भारु र तेस्रो त्रैमासिकमा १ हजार ८ करोड भारु लगानी गरिसकेको छ । यी दुई लगानीहरू सम्बन्धित त्रैमासिकमा भारतको सूचना तथा प्रसारण क्षेत्रमा भित्रिएका सबैभन्दा ठूला प्रत्यक्ष वैदेशिक लगानी थिए जसका कारण सन् २०२४–२५ मा स्टार इन्डियामा डिज्नीको कुल लगानी ३८ सय ४७ करोड भारु पुगेको छ ।
डिज्नीले हालै मार्च २८ मा समाप्त भएको त्रैमासिकका लागि आफ्नो भारतीय संयुक्त पहलबाट ६ करोड ४० लाख डलर इक्विटी घाटा भएको जानकारी दिएको छ । यो अघिल्लो वर्ष १० करोड ३० लाख डलर थियो । ६ महिनाको अवधिको लागि यो घाटा १३ करोड ६० लाख डलरबाट घटेर ९ करोड २० लाख डलरमा सीमित भएको छ ।
जनवरी–मार्च त्रैमासिकमा सूचना तथा प्रसारण क्षेत्रले १२ सय १३ करोड भारु प्रत्यक्ष वैदेशिक लगानी आकर्षित गरेको छ । सोही अवधिमा डीपीआईआईटीले इन्भेस्कोको स्वामित्वमा रहेको लगानी कोष ओएफआई ग्लोबल चाइना फन्ड एलएलसी मार्फत जी इन्टरटेनमेन्टमा ४१८ करोड भारुको प्रत्यक्ष वैदेशिक लगानीलाई पनि स्वीकृत गरेको छ ।
प्रतिक्रिया