चीनको कम्युनिस्ट सरकारका विरोधी धनाढ्य क्वो अमेरिकामा १ अर्ब डलर ठगीमा दोषी

एजेन्सी । निर्वासित चिनियाँ धनाढ्य माइल्स क्वोले आफूलाई बेइजिङको कम्युनिस्ट सरकार विरुद्धको अभियानकर्मीका रूपमा प्रस्तुत गर्थे । अमेरिकामा लगानीकर्ताहरूबाट १ अर्ब डलर ठगी गरेको अभियोगमा उनलाई ३० वर्षको जेल सजाय सुनाइएको छ ।

क्वोलाई क्वो वेनगुई नामले पनि चिनिन्छ । चीन सरकारको आलोचना गरेर आकर्षित गरिएका अनलाइन फलोअरहरूलाई ठगी गरेको अभियोगमा म्यानहटनको संघीय अदालतले सोमबार उनलाई यो सजाय सुनाएको हो ।

क्वोले उनीहरूलाई कथित लगानीका अवसरहरू बेचेका थिए । तर, त्यसबाट आएको पैसा १५२ फिट लामो सुपरयाट र फिफ्थ एभिन्यूमा रहेको सेरी–नेदरल्यान्डको पेन्टहाउस जस्ता विलासी जीवनशैलीमा खर्च गरेका थिए ।

अमेरिकी जिल्ला न्यायाधीश एनालिसा टोरेसले दुई महिना लामो मुद्दाको सुनुवाइ गर्दै क्वोले पीडितहरूलाई ठूलो आर्थिक र भावनात्मक क्षति पुर्याएको र लोकतन्त्र पक्षधर कामका लागि संकलन गरिएको पैसा आफ्नो अत्यधिक विलासी जीवनशैलीका लागि चोरी गरेकोमा दोषी ठहर गरिन् ।

‘क्वोले चीनमा लोकतन्त्र ल्याउन चाहने मानिसहरूलाई शिकार बनाए,’ टोरेसले भनिन् ।

सुनुवाइका क्रममा अदालत कक्षमा क्वोका धेरै समर्थकहरूको उपस्थिति थियो । उनले अझै पनि आफू निर्दोष रहेको दाबी गरिरहेका छन् । उनलाई अदालतबाट बाहिर लैजाँदा समर्थकहरूले उनको पक्षमा हुटिङ गरेका थिए ।

संघीय सरकारी वकिलहरूले क्वोलाई कम्तीमा ३० वर्षको सजाय माग गरेका थिए र धेरै पीडितहरूले आफ्नो जीवनभरको कमाइ गुमाएको तर्क गरेका थिए । क्वोले कुनै निश्चित सजाय नतोकी उक्त मागभन्दा निकै कम सजायका लागि आग्रह गरेका थिए ।

जेल सजायका साथै उनलाई अवैध योजनाबाट आर्जन गरेको ८८ करोड ९० लाख डलर जफत गर्न पनि आदेश दिइएको छ ।
सन् २०२४ को सुनुवाइका क्रममा क्वोको प्रतिरक्षा टोलीले उनको राजनीतिक सक्रियताको मुद्दा उठाउँदै चिनियाँ नेताहरूलाई जिस्क्याउन उनले आफ्नो सम्पत्ति प्रदर्शन गरेको तर्क गरेको थियो । उनकी एक वकिल मेलिन्डा साराफाले चीनमा लोकतन्त्र र त्यहाँका नागरिकहरूको राम्रो जीवनका लागि उनको अटल समर्थन रहेको दाबी गरिन् ।

‘माइल्स क्वो कुनै राजनीतिक अभियन्ता होइनन्,’ सहायक अमेरिकी महान्यायाधिवक्ता रायन फिन्केलले प्रतिवाद गरे, ‘उनी एक ठग र चोर हुन् ।’

क्वोलाई अदालत पुर्याउन ढिलाइ भएपछि सजाय सम्बन्धी सुनुवाइ केही घण्टा ढिलो सुरु भएको थियो । सुनुवाइका क्रममा क्वोले दोभाषेमार्फत न्यायाधीश टोरेसलाई सम्बोधन गर्दै आफूले सजाय सार्न बिरामी भएको नाटक गरेको भन्ने फिन्केलको दाबीलाई खण्डन गरे ।

क्वोले न्यायाधीशलाई बिहान आफ्नो कोठामा बेहोस भएको र पछि रगत बान्ता गरेको बताए ।

सजाय सुनाउनुअघि न्यायाधीशले एक अज्ञात विषयमा गोप्य सुनुवाइ पनि गरिन् । भाग्न सक्ने जोखिमका कारण धरौटी अस्वीकृत भएका क्वो विगत तीन वर्षदेखि हिरासतमा छन् र सो समयलाई उनको सजाय अवधिमा जोडिनेछ ।

‘उनी अझै पनि आफू निर्दोष रहेको अडानमा छन् र पुनरावेदन गर्ने योजनामा छन्,’ उनका एक वकिल जोशुवा ड्राटेलले सुनुवाइपछि भने ।

चीन सरकारको विरोधीको रूपमा क्वोको पहिचानले धेरै अमेरिकी राजनीतिक व्यक्तित्वहरूलाई उनीतिर आकर्षित गर्यो जसमध्ये सबैभन्दा उल्लेखनीय नाम स्टीभ ब्यानन हो । ब्यानन राष्ट्रपति डोनाल्ड ट्रम्पको पहिलो कार्यकालमा ह्वाइट हाउसका वरिष्ठ सल्लाहकार थिए ।

सन् २०२० मा ब्याननलाई कनेक्टिकटको तटमा क्वोको याटमा हुँदा ठगीकै आरोपमा पक्राउ गरिएको थियो । पछि ट्रम्पले ब्याननलाई माफी दिएका थिए ।

सरकारी वकिलका अनुसार, क्वोका अन्य ठगीहरूमा कम्तीमा १० हजार डलर प्रवेश शुल्क लाग्ने एउटा विशेष निजी क्लब, हिमालय एक्सचेन्ज नामक क्रिप्टो प्लेटफर्म र कृषि ऋण कार्यक्रम समावेश थिए ।

म्यानहटनको पेन्टहाउसका अतिरिक्त क्वोको न्यु जर्सीमा ५० हजार वर्ग फिटको एउटा ऐतिहासिक बंगला पनि थियो । सरकारी वकिलहरूले उनले लगानीकर्ताहरूको पैसाबाट आफ्नो लागि १० लाख डलरको रातो ल्याम्बोर्गिनी र छोराका लागि ४० लाख डलरको फरारी किनेको बताए ।