एजेन्सी । एप्पलले मोबाइल चोरीबाट जोगाउनका लागि नयाँ र प्रभावकारी सुरक्षा फिचर ल्याउने तयारी गरेको छ ।
एप्पल प्लेटफर्ममा मोबाइल ह्यान्डसेट चोरी हुनबाट जोगाउन ‘फाइन्ड माइ’, ‘एक्टिभेसन लक’ र ‘स्टोलन डिभाइस प्रोटेक्सन’ जस्ता सुविधाहरू पहिलेदेखि नै उपलब्ध छन्।
तर, चोरी भएका वा खोसिएका स्मार्टफोनहरू फेला पार्न वा सुरक्षित राख्न यी प्रणालीहरू कतिपय अवस्थामा सीमित साबित भएका छन्। यही कमजोरीलाई सुधार्न एप्पलले अब नयाँ र प्रभावकारी सुरक्षा फिचर ल्याउने तयारी गरिरहेको छ।
विभिन्न रिपोर्टहरूका अनुसार, यो नयाँ फिचर लागू भएपछि यदि कसैले आइफोन चोरी गर्छ वा हातबाटै खोसेर भाग्छ भने, केही क्षणमै फोन स्वतः बन्द (लक) हुनेछ।
यो प्रविधि एप्पल स्टोरमा प्रदर्शनका लागि राखिने ‘डेमो ह्यान्डसेट’ जस्तै हुनेछ। यदि कसैले फोनलाई तीव्र गतिमा झट्का दिएर तान्यो भने, फोनले त्यसलाई खतराको सङ्केत मान्नेछ र तुरुन्तै लक हुनेछ। यसरी लक भएको फोन पुनः सञ्चालन गर्न प्रयोगकर्ताले आफ्नो चेहरा प्रमाणित गर्नुपर्ने हुन्छ, जसले गर्दा अनाधिकृत व्यक्तिले फोन चलाउन पाउने छैनन्।
एप्पलले आइफोन चोरी भएको पहिचान गर्न विभिन्न किसिमका ‘सिग्नल’ हरूको प्रयोग गर्नेछ। मोबाइल खोसिएको वा असामान्य तरिकाले प्रयोग भएको खण्डमा प्रणालीले त्यसलाई तुरुन्तै पहिचान गरी सुरक्षा घेरा सक्रिय बनाउनेछ।
सुरुवाती चरणमै फोन अनलक गर्नका लागि फेस अथेन्टिकेसन अनिवार्य गरिने हुनाले चोरले फोनको डाटा वा सेटिङमा पहुँच पाउन मुस्किल हुनेछ।
एप्पलले यस वर्ष आफ्नो नयाँ सिरिज ‘आइफोन १८’ सार्वजनिक गर्दैछ, जसमा कम्पनीले धेरै नयाँ फिचर र अत्याधुनिक चिपसेट प्रयोग गर्ने बताइएको छ।
प्रतिक्रिया